La Usc di Ladins

En sabeda ai 24 y en domënia ai 25 d’otober gnará la strada statala SS 244 dla Val Badia stlüta daldöt al trafich danter Longega y Picolin. Plü avisa dales 8:00 da doman di 24 d’otober cina ales 18:00 di 25 d’otober. Al é preodü da romené demez i lëgns atocá dal chefer, por garantí la segurté de chi che passa sön la strada y dles infrastrotöres. Ara se trata dles ultimes fases di laurs bele inviá ia da d’aisciöda/isté por smendrí le prigo che al tomes jö peres o lëgns, y mioré la segurëza sön strada. Tl toch en chestiun é la Repartiziun Infrastrotöres tl laur da mëte en segurëza la strada cuntra la tomada de peres, y ara podará insciö aprofité dla stlüta totala dla SS 244 por realisé dui canai de desgorta tl cheder dles atres mosöres de segurëza.
Por le trafich lisier él preodü na deviaziun tres la strada provinziala por Rina. Por le trafich pesoch n’él degöna alternativa söl post. Le trasport dl lat pó gní fat tres la strada provinziala da Rina. Por ci che reverda le trasport publich, vëgn la linia 460 partida sö te döes perts: öna da Bornech a Longega y l’atra da Picolin a Calfosch, deperpo che la linia N460 jará ma da Picolin a Calfosch. I orars de referimënt ciafon sön la app südtirolmobil y sön la plata web www.suedtirolmobil.info

 (osp/pablo)