La Usc di Ladins

"Cun le ladin röion ma cina a Peraforada"… a chësta frasa, che da möt ái aldí impó n per de iadi, ái messü ponsé, do avëi tigní avisa sura le ladin le referat prinzipal (keynote) de n gran congres sura i lingac de mendranza, sté dai 23 ai 25 de setëmber tla université franzeja de Montréal tl Canada. Le congres é gnü organisé da Jean–Rémi Carbonneau, professur titolar dla catedra de "Mendranzes linguistiches comparades".
L’ultim de dl congres, en gaujiun dl de europeich di lingac, á i organisadus orü organisé n pice curs de mesora de vigni lingaz rapresenté söl congres. Al curs de ladin – che é sté plü dessigü le pröm curs de ladin tigní tl’America – á tut pert 12 porsones, danter l’ater ince Joan–Luís Luís, un di scriturs catalans plü conesciüs de nüsc temps y ghest d’onur dl congres. N ater ghest d’onur é stada Elisa Valentin da Balsan, mo cun intrami i geniturs dla Val Badia, che vir bele da agn tl Canada y é intratant gnüda vize–sotministra (le degré plü alt dl’aministraziun dl Québec).

Deplü t’La Usc di Ladins di 16 d’otober  (PV)