La Usc di Ladins

Tel segn de continuità e fiduzia per l percors envià via tel enteres no demò de la categoria ma del teritorie en generèl, i sozi de ANEF (la Sociazion nazionèla di impianc portamont), ai 16 de setember a Riccione ge à renovà la encèria de presidenta a Valeria Ghezzi con na proroga de doi egn. Te chesta ocajion l é stat ence renovà per etres 4 egn l Consei general che tol ite en pèrt componenc de derit e en pèrt conseieres lité, esprescion de la 9 sezions teritorièles. 

Tel Consei general Anef apede a la presidenta Valeria Ghezzi l é ence Sandro Lazzari, stat president e en raprejentanza de la 9 sezions, per Anef Trentin l é Luca Guadagnini e per Anef Sudtirol Helmut Sartori. Tel Consei l é stat lità: per l Trentin Daniele Dezulian president de la SITC e Cristian Gasperi diretor general de Funivie Folgarida Marilleva; per l Sudtirol Elmar Pichler Rolle, Matthias Sepp, Martin Unterweger e Andy Varallo president del Consorzie impianc portamont Alta Badia; per l Venet Renzo Minella diretor marketing de la sozietà de impianc portamont de Sèn Pelegrin.

I sozi Anef te la radunanza à metù ensema n manifest che regoi emergenzes, besegnes e proponetes per meter al zenter la teres autes: n apel a la politica ence per la litazions. Chest document l é l frut del lurier de presciapech 280 firmes, imprenditores, istituzions e protagonisć de chest setor. L vel meter l’atenzion sul valor e la potenzalitèdes di teritories da mont, desche spazie de vita unich e emportant per chi che stèsc (o podessa jir a stèr) e per chi che laora (o podessa jir a lurèr) e desche patrimonie teritorial che nos duc godon e de chest sion responsaboi.

Vegn sotrissà l’emportanza di impianc portamont desche motor de duta l’economia de la mont per meter dant i vèresc e i empegnes del davegnir con 9 paroles chief: sostegnibilità, èga, energia, presidie del teritorie e segureza idrogeologica, lurier, segureza, turism, valor economich de la filiera de la mont, emportanza di investimenc.

De più su La Usc stampèda de vender ai 23 de setember.   (Monica Cigolla)