La Usc di Ladins

Canche i â fat l’ejam de maturité, dêi jí cun d’atri maturanc a fá eserzizi. Nosc professur de religiun gnô cun nos a Lichtentern, olache i stôn tla ciasa diozejana y ne podôn trëi dis alalungia nia baié. Mo porchël podônse ascuté sö referac ura la fede y nes dediché al’oraziun personala.
I â indere na dificolté, deache i savô che na sëra gnôl trasmetü tl radio dal ví mia opera preferida, le »Rigoletto« de Giuseppe Verdi, diretamënter a la Scala de Milan. Chëra dorâ almanco trëi ores. I ti sun jü pormez al maester di eserzizi, n cer’ siur Reiterer, che savô dër da s’un jí a nos jogn. I orô che al me conzedess ezezionalmënter y adascusc da ascuté chësta opera.
Al savô da tó söl scerio mi dejier, tambëgn sciöche da le refodé. Al â na motivaziun particolara: vigni studënt messâ s’inslené n’ora intiera dan le Santiscimo. Chësta jô insciö: dales 9 da sëra êl le pröm che jô te capela, olache al ê metü fora la Mostranza, y periâ tl chît tla presënza de Gejú Crist. Diesc menüc denant che la ora se rovass, messâl jí a descedé n ater studënt, che tolô spo ite so post. Insciö gnôl perié döta nöt dan le Santiscimo.
Dan da püch ái incunté n mi compagn de scora y i se l’un cuntada sön le tëmp dla maturité. Danter les beles recordanzes él – ciara ciara – ince gnü fora la ora d’adoraziun. Chësc compagn de scora, n academich, sintî tres ciamó ligrëza por chë ora de chît. Degügn ne ti â mai pité da tigní na ora de adoraziun. Por ël êl val’ daldöt de nü. Canche al ê bel su, de nöt, dan da Gejú tla ostia, sintîl cuaji na responsabilité ti confrunc de Gejú. Insciö se porvâl ci che al ê bun da ponsé ala presënza dl Signur. Al ti gnô imënt da avëi na udiënza privata cun Gejú. Zënza s’al aspeté, âl sintí la bunté dl Signur, y te chësc sentimënt de ligrëza y plenëza ê la ora tosc jorada.Denant se fajôl ciamó pinsiers, co che al ess fat da passé ia chë ora lungia; dedô ti desplajôra che ara ê bele rovada. Al ti restâ ma plü le dejier che la ora de adoraziun ne foss nia stada l’ultima. Tratan che al cuntâ, me fajôi morvëia che al se recordâ ciamó do 50 agn tan avisa de chësta esperiënza. I inviëii vignöna y vignun da anuzé l’ocajiun da baié cun Gejú. Chi che baia impara per­ sonalmënter, ciafará ince da d’ël na resposta personala.

Traduziun fora dal liber »Seelsorgliche Erfahrungen in Kirche und Schule – Mit 90 Jahren blickt Josef Granruaz zurück und voraus«, 2023

Le liber de siur Sepl podëise ves desćiarié debann sot ala plata dl Vinzentinum: www.vinzentinum.it/ueber-uns/service/news-und-termine/granruaz-buch