La Usc di Ladins

Colun él l valor de n projet? L lo domana Massimo Girardi, president de Transdolomites, en referiment al projet de la Ferata de la Veisc, do che l é vegnù fora che l Dirigent Patrimonie e Trasporc de la Provinzia de Trent Mauro Groff, do n confront col President de la PAT, ge à comunicà a RFI de »no jir inant co la verscion definitiva del Document de fatibilità de la alternatives projetuèles de la Ferata ajache l cost massa aut no consent de ipotisèr la sostegnibilità del projet medio tempore«. 
»Chel che l é scrit tel parer de la Provinzia stenton a l entener – disc Girardi – nos e noscia sociazion che da n muie de egn se dèsc ju per la mobilità sostegnibola de la Èlpes, aldò de la politica di trasporc europeèna, sostegnuda ence da istituzions de cooperazion anter la regions alpines desche EUSALP.«
Endèna ai 31 de mèrz Girardi ge à consegnà a duc i conseieres provinzièi la documentazion di studies fac fin ades su la ferata de la Veisc a na vida che i posse fèr sia dreta valutazions e ai 10 de oril Transdolomites à chiamà ite te sala de Comun de Sèn Jan la radunanza di sozi per la litazions del diretif e i festejamenc per i 20 egn. L president Girardi é stat confermà e l à rebadì amò n’outa la volontà de jir inant con l projet de la Ferata de la Veisc. 

Podede lejer dut su La Usc dai 17 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Monica Cigolla)