La Usc di Ladins

Imparé da soghé a sciah
Le Consëi de formaziun Badia organisëia a La Ila n curs de sciah por pici y gragn
Chi che ó imparé da soghé a sciah, á la po­scibilité da le fá pro le curs che vëgn organisé dal Consëi de formaziun Badia. Al é n curs por pici y gragn, che vëgn tigní en mertesc ai 21 d’aurí y en mertesc ai 28 d’aurí dales 16:00, te biblioteca da La Ila. 
Le curs vëgn tigní da Ca­terina Frontull. Por infor­maziuns plü menüdes y por les iscri­ziuns pón cherdé sö Rossana al numer 320 7237860.

Sostëgn bunorí por families
Ester geniturs – löm y ambria; insciö sciöche i sun, vara bun y canche i me stënti, me chiri aiüt. Chësc é le slogan dl Sorvisc de Sostëgn

• 
•  

View the embedded image gallery online at:
https://www.lausc.it/manifestazions-y-evenc/31618-manifestazions-atuales-speziales#sigProId32a94a6426

bunorí por families. Proscima incuntada a Picolin ai 20 de aurí
Al é n sorvisc por düc i geniturs che vëgn docá, geniturs susc y families cun mituns danter 0 y 3 agn, che é te situaziuns de desfida. En particolar vëgnel pité: sostëgn ales families te de ries situaziuns; soluziuns por smendrí le stres familiar; al vëgn ponsé a strategies desvalies svilupades adöm por ciafé soluziuns; renforz de döta la familia; düc i mituns dess avëi les medemes poscibilités; al dess gní realisé cosses tignon cunt dl cheder complet por sostigní la familia.
Nüsc esperc dl ciamp sanitar y sozial dá consëis aladô dles ghiranzes y ciafa deboriada soluziuns adeguades. Le sorvisc é debann, confidenzial y volontar. Por plü informaziuns podëise se lascé adintëne al 333 6203945 o ala e–mail fruehe.hilfen@bzgpust.it
Le sorvisc é a desposiziun tl’alzada a tera dl Raiun soziosanitar Val Badia, dales 8:30 ales 11:30, te chëstes dates: 20.04., 18.05., 15.06., 27.07 y 17.08.2026

»Les sorus Alzheimer«
En domënia ai 19 d’aurí él a Al Plan n teater da rí porté dant dala »Nuova Compagnia di teatro di Brunico«
»Le sorelle Alzheimer« é le titul dl teater che vëgn presenté chësta domënia ai 19 d’aurí dales 16:30, tl salf dles manifestaziuns a Al Plan. Al é la storia de ci che sozed te ciasa de trëi sorus atempades, che mët bel en mostra sü pröms sëgns de demënza. Scebëgn che ares é desmentioses, éseres ince furbes y te val’ momënc se recorderes avisa i bi momënc passá. Sön paladina sarál da odëi Serafino jobelné dal professur Fabian Fistill da La Ila, l’assistënt sozial jobelné dal dr. Daniel Agreiter y la trapolona Carminella jobelnada dal’avocata Monica Comacchio, zënza desmentié les trëi sorus Teresa (Laura Rastoldo), Carola (Fabia Endrizzi) y Antonia (Lola Mingrone), che é pilastri dla comedia y fontana de tröpes riüdes. Le regist Antonio Loguercio jobelnëia ince, tla iesta dl ploan Don Giulio y de Girolamo.

Iö me ó bun
Simon Kostner é da odëi sön paladina dl zënter cultural UFO a Bornech cun le monologh nü »Ich liebe mich... oder vom (Un-)Glück, ein Gutmensch zu sein«
Diesc agn do »Badiotten« y »Über Unver­träglichkeiten und andere Haustiere« se con­düj Simon Kostner indô te so monn de­morvëia – n post plëgn de ironia y intuiziuns fines, da olache an vëgn fora madër cun na bona porziun de amur por se instësc. 
Le toch nü de Simon Kostner, cun regia de Dietmar Gamper, sará da odëi ai 17 y ai 22 d’aurí, tres dales 20:00, sön paladina dl zënter dla jonëza y cultura Ufo a Bornech. Les prenotaziuns pó gní fates online tres la plata internet dl zënter o por telefon al numer 0474 555770.

Primal Focus – Niklas Jäger
L Circolo–Lia Mostra d’Ert à l plajëi de nvië ala mostra »Primal Focus«. La giaurida ie n vënderdi ai 24 de auril dala 19:00 tl self dla lia
I lëures de Niklas Jäger semea framënc de lecorc passei – motifs arcaics traspurtei tl pre­jënt. La formes y i sënies scëmpli zënza senificat ne uel da gën nia mustré su na de­finizion tlera. L mumënt te chël che Jäger tol tla man l rispl y rissa ite linies sun la spersa, lecorda chël dla persona preistorica che tën tla man si massaria per lascé n sëni de sé nstës.
La mostra resterà davierta nchin ai 17 de mei ntan i orares de giaurida: dal merdi nchin la dumënia, 16:00–19:00 – de sada y dumënia iel daviert nce danmesdì, 10:00–12:00. De lunesc iel stlut.

Music for Hope
La Mujiga de Sëlva nvieia a si cunzert da d’ansciuda n dumënia ai 19 de auril dala 20:00 tla dlieja de Sëlva
Cun meludies scialdi emu­zioneles de cumposidëures coche Anton Bruckner, Bert Appermont o Peter Meechan, uel la Mujiga de Sëlva tra­smëter cunfidënza y speranza per l scumenciamënt dl’an­sciuda. Sot ala bachëta de Alexander Perathoner saràl da audì pec scialdi senti­mentei y de atmosfera coche »Hymn of Glory« y »Lux Aurumque«.
Duc ie de cuer nviei a scuté su y se lascé purté dala ar­munies mparedes ite ti ultims mënsc.

»Zeitgeist« de Marco Forni
Te na ciaculeda cun Martina Rier prejënta Marco Forni si segondo roman »Zeitgeist«, 
n juebia ai 23 de auril dala 18.00 tl Tublà da Nives te Sëlva
Bernardino Zeitgeist planificova y urganisova a puntin uni aspet de si di y de si lëur. 
Ël ova la ossession de pudëi cuntrolé l daunì y de schivé melse­gurëzes y falimënc. L pativa de cronopatia, la »malatia dl tëmp«, tan fanatich de gestì si vita, che l se desminciova de viver...

Conzert d’aisciöda »Ega«
La Musiga »Catarina Lanz« d’Al Plan inviëia a so conzert d’aisciöda, en sabeda ai 25 d’aurí dales 20:30, sön paiun d’Al Plan
Sot la direziun de Georg Plazza gnarál porté dant n program cun 7 toc: »Lord of Seven Seas« de Kees Vlak, »Perspektiven« de Tobias Psaier, »Riverside Overture« de Robert Sheldon y »Atlantis« de Alexander Reu­ber. Do na palsa vára inant cun »Abel Tasman« de Alexander Pfluger, »The Falls« de Rossano Galante y »Pacific Dreams« de Jacob de Haan. Fora por la sëra condüj Timo Craffonara. 
L’entrada al conzert é lëdia, por na spë­nora de bona ván dij la Musiga bel iolan, y se conforta da ves saludé.