La Usc di Ladins

L'esperienza che l à vivù ti meisc passé a Gaza l é stat la più cruva, forta e dramatica che Gennaro Giudetti, l aesse mai vedù te duc i 15 egn spenui desche operator umanitarie te dut l mond. N père che jia stroz desche n mortèl te chel che cognea esser n ospedèl, coi eies tel vet e te man na sort de balota neigra brujèda, a chierir l sach neigher con ite sia femena morta per ge meter apede chel cef brujà, la soula roba che l era restà de sia fia. L é demò un di tenc ejempies che Giudetti à portà dant, e che l conta te sie liber 'Con i miei occhi', per ge dir e ge fèr entener a duc che a Gaza l é mort ence l'umanità e sozede robes che va sorafora ogne imaginazion.
Ai 8 de oril, a la fin de la pruma sera de la rassegna endrezèda e vidèda da l'assessora a la Cultura del Comun de Sèn Jan Mirella Florian con 'Liberi da dentro', duc é se n jic mingol destrametui, ma segur più informé e consapevoi e da la paroles de Nadia Cadrobbi i à ence podù capir che ogneun te sie picol l pel fèr vèlch de concret.
L dì do Giudetti à portà sia ousc ence anter i studenc de la Scola de Fascia. La rassegna del Comun de Sèn Jan va inant insnet, vender i 17 de oril da les 20:30 semper te teater del oratorie de Poza olache, con la proiezion del film 'Ariaferma' la reflescion sarà sul sistem de reclujion.

Podede lejer dut su La Usc dai 17 de oril da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (LG)