La Usc di Ladins

N chèrt de secol é passà da canche, per ge dèr luster a la cultura e a la musega ladina, l é stat metù su la sociazion Aurona. Dut era vegnù fora aldò del projet de fèr su a Moena l Teater de Navalge: per valorisèr chela gran strutura e la fèr doventèr n vero teater de duta la val ge volea idees e proponetes con n program de valuta, magari n festival de l'opera ladina, per slarièr fora la cultura musicala anter la jent del post e ge dèr na perferida de valuta ai ghesć.
Aldò de chest Fabio Chiocchetti, che desche diretor del Istitut Cultural Ladin se aea jà cruzià de fèr orchestrèr l 'Laurin' del Canori, l à scrit l test de na opera ladina deldut neva, 'Conturina', ispirèda a la cognosciuda contia su la tousa enmarmolèda e l ge à proponet de la meter en musega al joen componist Claudio Vadagnini, da Trent, moenat de naa. Del 2001 Navalge no l era amò vertech e l ICL, col sostegn de la Region, à portà 'Conturina' al Teatro Sociale de Trent e vin Ampez tel chèder de Euroscola Ladina, sot la direzion del maester Vadagnini. Tel medemo an Chiocchetti e Vadagnini à metù su la sociazion Aurona.
Per l cedean Aurona à enjignà n libret con la storia e l'atività, sostegnù da l'assessora a la cultura del Comun de Moena Cristina Donei semper vejina a la sociazion, e l'à enjignà n spetacol dal titol 'L viac de Aurona' che vegn prejentà te teater de Navalge ai 19 de messèl da les nef da sera, con entrèda debant.

Podede lejer dut su La Usc stampèda dai 10 de messèl da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)