La Usc di Ladins

L decret lege nr 1 de chest an 2022, aproà ai 7 de jené, l à amò per argoment i vazins. La neva norma perveit per la pruma outa n obligh de se encalmèr per na fascia de persones aldelà de sia profescion: duc chi che à compì i 50 egn i cogn fèr l vazin. Se no i cognarà paèr na multa, enceben che sun chest sie amò vèlch mèlsegureza: una tantum o ence più outes? E se no la vegn paèda? Ampò se sà che te chest setor la mèlsegureza la é bendeché, e i “furbi” che no respeta la normes e no paa i é de spes e te ogne setor.

L obligh de vazin era jà stat metù en doura te etres paijes de l’Europa, per ejempie te l’Austria per duc e te la Grecia sora i 60 egn. L DL nr 1/22 slèria fora l obligh de vazin ence al personal di atenei, metan donca per l’Università la medema normes che duta l’autra scoles; amò apede l perveit l zertificat vert dai 20 de jené per chi che se em prevèl di servijes a la persona, e dal prum de firé per chi che va te ofizies publics e comerzièi.

Chesta la ultima dezijions aproèdes dal Goern per chierir de vegnir fora da chesta situazion che condizionea noscia vita da massa temp.

L lonch percors di vazins era scomenzà ai 27 de dezember del 2020, do aer passà gran pèrt del 2020 a sperèr che i vegne descorii, che i rue e che duc posse apede.
Ades ge vegn domanà a duc amò mingol de pazienza e de sens de responsabilità.

Duta la tapes che à segnà l cors di vazins del 2021, coi provedimenc, l gran empegn de aministrazions e volontariat per endrezèr l zenter de vazins ence te Fascia, l booster” e ence la desfidenza e l front di contraries é da poder lejer su La Usc stampèda de vender ai 7 de jené.

 (Lucia Gross)