La Usc di Ladins

Do i bie recognoscimenc vadagné foravia, l Coro Nosc da Soraga se à ciapà l batiman più fort e l’aprijiament più sentù da soa comunanza.
Te La Gran Ciasa a Soraga, en sabeda ai 29 de jugn, i 12 ciantores, più l maester (col nef component Andrea Bonelli), se à ejibì te n conzert fora de anter: »Dit, scrit e ciantà« l era l titol cernù per l’ocajion ajache apede a le ciantie l era ence scric e parole. N esperiment da ardiment, i ge à dit, fat de musega e scric per ladin, n enconter anter note e parole, anter ousc e vijion. N esperiment garatà, dijon noi, che à fat aprijiar l son douc de le ciantie e de le note ensema a chel più deribolent de le parole.
Chest’outa l Coro Nosc à domanà l didament de n’autra sociazion de la val, la Filodramatica La Mizacoles de Ciampedel. Trei atore: Loreta Florian, Marion Boso e Sabrina Riz, à interpretà i scric per ladin del Maester Peter Decrestina.

Se pel lejer dut su La Usc nr 25 dai 4 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)