La Usc di Ladins

L é temp de mudamenc e de saluc, per i fidei de Fascia, e soraldut per la val de sot. Giusta te n meis les cognarà saludèr l piovan don Andrea Malfatti, che l se n jirà da Fascia do aer ret per 11 egn la 5 parochies de Soraga, Vich, Poza, Pera e Mazin per jir a rejer doi parochies a Rorei. Ma jà en domenia ai 31 de aost l é stat na dì de saluc. A Pera l é stat endrezà la festa de desgorta de P. Chrétien Tadjikam Sonta Mada (protagonist de l’intervista ‘Dantcà y danapert’ sul numer passà de nosc sfoi) che dal 2019 en ca l é vegnù a didèr don Andrea, che l era sie dozent a l’università a Unejia, te la zelebrazions di Sènc, de Nadèl e de Pèsca e via per dut l istà, e che ades l é se n jit de retorn te sia tera, l Camerun.

P. Chrétien à zelebrà con emozion e con legreza la messa, compagnèda con gaissa e braura da n gran grop de ciantores di cores di joegn e di bec ence de l’autra parochies: cianties e sons ritmé che P. Chrétien à moscià de aprijièr dassen n muie. Apede el don Andrea, che l lo à rengrazià per sie servije prezious, ma ence per l’amicizia che te chisc egn é cresciuda anter i doi preves e l à lodà ence l percors academich fat da P. Chrétien, che te chisc egn à arjont l dotorat en teologia a Roma, e che ades l jirà a rejer l seminarie tel Camerun.

Se pel lejer dut su La Usc nr 34 dai 5 de setember: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.

 (Lucia Gross)