La Usc di Ladins

Jí, gní, resté
Te na serada a San Martin de Tor se fejon la domanda: »Ci ó pa dí se sintí da ciasa?«
L’Istitut Ladin Micurá de Rü y le Museum Ladin Ciastel de Tor inviëia bel en domënia ai 14 de setëmber dales 18:00, tl gran salf dl Istitut a San Martin. Sot al titul »Jí, gní, re­sté« él auturs jogn y auturies jones dla Val Badia che inviëia da tó pert a na sëra de reflesciun y confrunt sön la domanda »Ci ó pa dí se sintí da ciasa?«, plü avisa sön les tematiches dla portignënza y dl abité. 
Chësc fejon tres la musiga cun »Cooperaziun Planta«, tres la poesia cun Lucia Piccolruaz y tres l’ilustra­ziun cun Sil­via Baccanti. La modera­ziun é de Nadia Moling.

Te Museo con Petra
Tel Museo Geologich de la Dolomites a Pardac l é n percors studià per ge permeter ai bec de descorir l museo en autonomia con sia families
L é na beza feruscola e curiousa e l é la mascotte del Museo Geologich de la Dolomites de Pardac, senta teritorièla del MUSE de Trent. L’à inom Petra e l é la protagonista de n per­cors che à inom apontin »Al museo con Petra«, con ativitèdes pissèdes per la families, per poder descorir l museo coi bec en autono­mia. Na picola guida de esplorazion dolomitica, con na mapa gustegola e ativitèdes che vida, compagna e engaissa i bec a jièr e a cognoscer la marevees de la storia de nosc raion.
L material per chest percors l à n cost de 3,50 euro e l é conseà per bec dai 6 ai 10 egn. Se pel l domanèr te entrèda del Museo de la Dolo­mites de Pardac, che l é avert dal mèrtesc a la domenia da les 10:00 a les 13:00 e da les 16:00 a les 19:00. Info su www.muse.it

Cursc da jadiné
L’Ice Club Alta Badia organisëia indô cursc por mitans y mituns dai 4 agn insö
I cursc da jadiné pëia ia ai 22 de setëmber y vá inant cina ai 18 de dezëmber. 
Por les mitans y i mituns che vá a scora, sará le curs vigni lönesc y mercui dales 16:00 ales 16:45; por mitans y mi­tuns dla scolina vigni mer­tesc y jöbia dales 14:45 ales 15:30, o dales 15:30 ales 16:15. 
Le cost dl curs é de 180,00 € por dui dis al’edema y 120,00 € por un n de al’ede­­­­ma. Por informaziuns y iscri­­­ziuns prëibel cherdé sö o scrí al numer 339 4327329, do les 17:00.

100 ani Mujiga de Sëlva
Sun plaza de Chemun de Sëlva vëniel metù a jì na festa de doi dis n ucajion di 100 ani dla Mujiga de Sëlva
La festa scumëncia ai 6 de setëm­ber dala 10:30 cun n bel Früh­schoppen acumpanià dala Böh­mische de S. Cristina y jirà inant dut l di cun cun cunzerc d’uni sort: l sunerà la Mujiga de Götz­ens, de Coira/Chur, de Amst­etten y la grupes Odle­Sound, South­brass y dala 21:00 i The Blokes. 
N dumënia ai 7 de setëmber dala 09:30 saràl la Santa Mëssa suneda dal Unknown Brass y dala 10:30 la festa ufiziela, ulache l unirà prejentà l liber »100 ani Mujiga de Sëlva«. Ntan dut l di saràl de plu mujighes che sunerà y dala 15:30 iel la defileda. Duc ie nviei de cuer!