La Usc di Ladins

Da Sènta Maria Maor se à serà su l temp per manèr ite i filmac coscì da poder tor pèrt al concors Let’s stick ladin! N soul obietif: valorisèr a na moda gustegola i adesives fac fèr da la sociazion en ocajion de si setant’egn. Pèstres da color, bandieres ladines e fascènes é doventé donca protagonisć de 13 curc filmac, con o zenza musega, che se ‘dèsc batalia’ per venjer i trei pesć metui dant: na facera, n tremol e na maia ladina.

I partezipanc i se à pissà dalbon modes desferentes per valorisèr chisc stickers: i é vegnui taché te n post un più fora de anter che l auter e l é stat chi che à tout ite giaves e amisc per realisèr sketch curiousc. Anter i partezipanc, à tout pèrt ence vèlch sociazion de folclor. Ampò, seben che l numer de video rué ite l no sie gran e granent, i adesives i é jic ‘a ruba’ e l é stat ence chi che à domanà de n aer valgun de più per i manèr foradecà.

Viapura. Ades l é l temp de dezider colugn che l é i trei video più bie e sarà belimpont nosc publich de Instagram a dezider chi che sarà i venjidores. Vigni dotrei dis vegnarà metù doi video, un contra l auter, su la stories de Instagram de noscia piata @uniondiladinsdefascia e se podarà la litèr per 24 ores. Chel che ciapa più stimes podarà jir inant, descheche moscia l schem.
Can sarèla la premiazion? Ai 19 de otober, en ocajion de la Festa del Rengraziament che chest an sarà na festa zis spezièla ence percheche vegn festejà i 70 egn de la sociazion. Vegnarà premià i trei venjidores e ge vegnarà dat n picol pest a duc chi che à tout pèrt e che ne à didà. Segnave su per temp!