La Usc di Ladins

L'inom dl pröm portadú dl'onoranza nöia "Merit Ladin" é danman: la iuria de esperc y espertes á chirí fora chëst' edema al’unanimité le linguist dr. Lois Craffonara conesciü sura i confins dl Südtirol fora. L'onoranza ti gnará surandada ai 21 de setëmber dl 2025 tl cheder dl "De dla cultura ladina" dal assessur por la formaziun, l'istruziun y la cultura ladina Daniel Alfreider.

La iuria é stada metüda adöm da André Comploi, diretur dl'Intendënza y Cultura ladina, Jürgen Runggaldier, diretur dl Istitut Ladin Micurá de Rü, Katharina Moling, direturia dl Museum Ladin Ciastel de Tor, Sabrina Rasom, direturia dl Istitut Cultural Ladin Majon di Fascegn, y Paul Videsott, professur ordinar dla Repartiziun ladina dla Facolté de Sciënzes dla Formaziun dl‘Université Lëdia de Balsan.

La iuria scri danterater te süa motivaziun: "Le dr. Lois Craffonara é zënzater reconesciü sciöche 'degan' dla linguistica ladina. Sciöche pröm diretur dl Istitut Ladin Micurá de Rü él sté bun da consolidé l'autonomia dl ladin sciöche lingaz neolatin tres sües inrescides y tó y jí insciö les posiziuns contrares slariades fora laota tl monn academich. Implü él sté cofondadú dla revista scientifica Ladinia, conesciüda a livel internazional, che al á dé fora agn alalungia. Sües tröpes inrescides y publicaziuns tl ciamp dla linguistica, dla storia, dla storia dl'ert y dla leteratöra á albü faziun cotan sura i confins dla Ladinia fora."

La Junta provinziala da Balsan á aprové ala fin de messé l'introduziun dl’onoranza nöia "Merit Ladin", cun le fin da onoré i meric straordinars tl'inrescida scientifica, tl‘intermediaziun y tla creaziun artistica tl ciamp dl lingaz y dla cultura ladina.

"I sun dër contënt cun la dezijiun dla iuria: le dr. Lois Craffonara n'á nia ma arjunt prestaziuns scientifiches straordinares, mo bëgn ince porté pro a na moda fondamentala al‘intermediaziun y trasmisciun de nosc lingaz y de nosta cultura. Al á dagnora ciaré sura l’ur de so taí fora, chirí le barat cun d'atres mendranzes y renforzé dassënn le lian cun nüsc parënc retoromans ti Grijuns y tl Friul. Porchël él ël n pröm portadú da de gragn miric dl "Merit Ladin", alza fora l'assessur por la formaziun, l'istruziun y la cultura ladina Daniel Alfreider.

"Lois Craffonara á ince influenzé sura sües inrescides y publicaziuns fora la cosciënza dl'identité ladina y á porté pro - nia ma tl ciamp di neologisms - a na manira dezisiva a fá a na moda che le lingaz mëtes raisc tla vita da vigni de dles ladines y di ladins“, ajunta le diretur dl'Intendënza y Cultura ladina André Comploi. "L'onoranza dess sëgn ti sporje onur a süa opera y l'alzé fora tl medemo tëmp sciöche ejëmpl y incorajamënt por l'impëgn a sorvisc dl lingaz y dla cultura ladina."

L'onoranza "Merit Ladin" ti gnará surandada ofizialmënter al dr. Lois Craffonara sot forma de n'atestat rapresentatif da pert dla Provinzia autonoma de Balsan. Paralelamënter á la Lia di artisć y dles artistes dl Südtirol metü a jí cun l'Intendënza y Cultura ladina le concurs artistich "Ert X Merit Ladin". L'opera d'ert chirida fora dala iuria ti gnará surandada al dr. Lois Craffonara tl cheder dl "De dla cultura ladina", ai 21 de stëmber a San Martin de Tor.