La Usc di Ladins

Les é states n muie la segnalazions e i video publiché anter angern e anché (ai 7 e 8 de messèl) de doi aerei militères che é passé n muie basc soraite i paijes de Fascia. La costion é ruèda ence te Jonta provinzièla con na interogazion a responeta scrita prejentèda anché, mercol ai 8, dal Conseier provinzièl ladin de la Sociazion Fassa Luca Guglielimi.

»Taca l istà e, a ora, se taca endò a ciapèr desvaliva segnalazions de aeroplans militères che sgola basc sora la valèdes de la Veisc. No demò sora la valèdes de Fascia e Fiem, ma ence te Rendena e le Giudicarie passa man a man aerei militères che crea alarmism e cruzie. Ence se se capesc l besegn de adestrament e pratega de nesc corpes aeronautics, cree che i sie giustifiché da ejempies cognosciui e mesties nosc festidech e nosc turbament.«

Chesta la paroles del Conseier provinzièl Gugliemi che te sia interogazion ge domana a la Jonta se:   la vegn metuda en consaputa de ogne passaje de aerei sora l teritorie provinzièl con dantfora la comunicazions di pians de sgol; se l é a la leta report de chisc sgoi; se l é na mapatura storica de la desvaliva miscions de adestrament programèdes e realisèdes sora l teritorie provinzièl.

 (MCI)