La Usc di Ladins

Angern domesdì, jebia ai 15 de otober, se à destudà do na longia malatia Paolo Fosco da Cianacei de 85 egn. La comunanza de Fascia se strenc apede a la femena Rosa, i fies Stefano, Sofia e Marco. L era cognosciù da duc per sie gran empegn tel turism, patron del Hotel Bellavista sun Pecol fat su da sie père Luigi e da sia mère Lidia Schmalzl, e desche pionier tel setor di impianc portamont. L aea tacà ite so percors te la SITC jà ti prumes egn ’70 desche comember del Colege Sindacal, l era stat el a ideèr l logo de la sozietà che l raprejenta l soreie che nasc, che cresc e che se smaora. Dal 1972 al 1974 l é stat revisor di conts e dal 1978 al 1999 l à fat pèrt del Consei de Aministrazion, dal 1993 al 2011 desche vizepresident e dapò fin del 2020 president e do conseier fin del 2023. L é stat per egn ence tel Consei de Aministrazion de la sozietà de impianc portamont Lujia e SIT Belamont e ence tel CdA de la Coprativa de Cianacei.

L president de la SITC Daniele Dezulian lo recorda desche na persona semper n muie curiousa e ascorta al svilup de la val con la vijion e l fondament del passà e del davegnir. »L era la memoria storica - l ne à dit Dezulian - l à vivù i egn sobito do la vera e canche l é nasciù la sozietà del ’47 el l era n bez ma l à vedù te chi egn la val pontèr via dal nia e se svilupèr. L à vedù nascer l Dolomiti Superski del ’74 ensema a Fiorenzo Perathoner e canche l é stat president de la SITC l é stat egn de gran emportanza e svilup.« N muie de jent lo recorda con gran stima. La sepoltura é en lunesc ai 19 de otober da les 14:30 te gejia del Sacro Cher de Cianacei.

De più su La Usc de en vender ai 23 de otober.  (Monica Cigolla)