La Usc di Ladins

Bele da truep ani incà uel la urganisazion turistica de Gherdëina ti recunëscer ai paures l lëur che i fej per l cialé ora dla cuntreda y per la valeda, ti sëurandajan l pest per l "paur dl ann".

Chëst ann iel unì numinà Mark Demetz dl luech dai Mulins a Soplajes. Ël zidla alpacas y à nce nvià via la produzion de lana de chisc tieres y de prudoc fac cun chësta lana.

Dolomites Valgadena Marketing, l cunsorz per l turism de Gherdëina, se ova bele dan truep ani lascià tumé ite chësta scumenciadiva de dé ora l pest dl paur dl ann, per auzé ora l lëur che vën fat dai paures te nosta valeda per la cura dla cuntreda y dla natura. Da n doi ani incà, y per jì pea nce cun la tendënzes de ti dé pëis ai prudoc dl raion, ala nventiva, ala sustenibltà, se àn mpensà de premië chëi che se à lascià tumé ite n cunzet particuler, vel' idea uriginela.

Normalmënter vën l pest sëurandat n ucajion dla festa dl desmunté dl bestiam che vën metuda a jì te Val tl scumenciamënt de setëmber. Sce chësc ne sarà chëst ann nia mesun pervia dla situazion dl coronavirus che se spiza pro, uniràl danz sëurandat l pest te na maniera mpue manco ufiziela.

Ora de n hobby iel deventà n lëur
S'l on ciaculeda cun Mark Demetz y se on lascià cunté coche la ie pa perdrët unida a s'l dé che l à scumencià a tenì alpacas.

Velch deplù y na ntervista a Mark Demetz iel da liejer te La Usc dl 21 de agost 2020


Sun la fotografia Mark Demetz cun si alpacas (foto: cunsorz turistich Gherdëina)