Tl Tublà da Nives de Sëlva iel stat na giaurida duta tl sëni dla garejedes de schi alpin te Gherdëina, ncuei vënderdi, ai 12 de dezëmber
Dala prima garejedes sun Dantercëpies ti prims ani dl 1900 nchin ala garejeda sun l purtoi de Ronc ti ani '70: pra la mostra storica vëijen fotografies da zacan, ngrandides, che mostra mumënc fotografei de schiadëures y tifosi pra la garejedes plu mpurtantes de schi alpin te Gherdëina di ultims cënt ani. Daujin a chël iel nce ogec nteressanc di ani passei, documënc y articuli de zaites desfrëntes che va ite tla medema tematica. Cun la garejedes de Copa dl Mond che ie bele te puec dis, àn naugurà chësta mostra che passenea y che dà l mesun a chi che ti cëla a se lascé traspurté defin te n mond dal schi.
L se trata de na mostra che ie nasciuda da n'idea dla lia Culeziunisć, numismatich y vedla chertes de Gherdëina che à, deberieda cun la lia Tublà da Nives y l Saslong Classic Club y d'autri sustenidëures, abinà dut l material che n à metù ora.
Deplù n con' de chësta mostra pudëis liejer tla proscima edizion de La Usc che vën ora l'ena che vën, n vënderdi ai 19 de dezëmber.
Julia Lardschneider
