La Usc di Ladins

»dietro – davanti - vor – zurück«
L Circolo – Lia Mostra d’Ert nvieia ala mostra de Thomas Lange y Mutsuo Hirano, tl self dla mostres dla Lia Mostra d’Ert a Urtijëi. La giaurida ie ai 19 de dezëmber dala 19:00
»Chi che ne desmëncia nia l passà, cëla al daunì«.
Lange mescëida pitures di gran mudiei dl passà cun motifs che scumparësc debota tl prejënt, cun na tematica pitorica nueva.
Hirano ti va do ala medema streda ma tla terza di­menscion dla ceramica, che ne se ispirea nia mé al passà, ma nce al cunfront dl’ert giapunëija y chëla europea, zënza pierder si identità.
Ntroduzion: Davide Sarchioni.
La mostra resterà da udëi nchin ai 16 de jené 2026, dal merdi nchin al venderdi, 16:00–19:00 y de sada y dumënia, 10:00–12:00, 16:00–19:00.

Barachin dal vin cöt a La Val
Sön plaza de Comun a La Val vëgnel daurí tratan l’Advënt y cina ai 6 de jená le »Barachin dal vin cöt«, cun deplü apuntamënc, ince musicai
Les temperatöres s’á arbassé, porchël él gran ora da scialdé anima y corp cun n bun vin cöt o n bun soft da pom cialt en compagnia. Cun ligrëza ves lasciunse alsavëi che ince en chësc ann él l’Uniun dl Sport da La Val che s’inviëia al »Bara­chin dal vin cöt« sön plaza de Comun a La Val. Pro i apuntamënc él ince preodü intratignimënt musical.
Le barachin sará davert cina ai 6 de jená, tres dales 19:00 inant. Chisc é i apuntamënc: 12.12., 13.12. (cun musiga de Victor y Paolo), 19.12. (Manuel Costa­biei cun i orghi a man), 25.12. do mëssa grana (Alphörner), 26.12. (Duo Gota), 27.12. (Emily y Mattia), 6.01. (Po­scignara cun les patrones y intrati­gnimënt cun Christian y René). Gnide a nes ciafé, i s’la inconfortun!

Gramatica dl ladin scrit dla Val Badia
En mercui ai 17 de dezëmber vëgnel presenté le liber de Ruth Videsott, tl Istitut Ladin a San Martin de Tor
Le liber dla »Gramatica dl ladin scrit dla Val Badia« é danman y en mercui ai 17 de dezëmber dales 18:00 vëgnel presenté, tl gran salf dl Istitut Ladin Micurá de Rü a San Martin de Tor.
Do le salüt dles autorités, sarál le prof. Paul Videsott che fej na introduziun y spo él l’auturia Ruth Videsott che pre­sentëia la publicaziun nöia.
La sëra gnará abelida cun na cornisc leterara de Rut Bernardi, sciöche ince dala musiga de Anita Obwegs y Philipp Schörghuber.

Prejentazion dl Schi Club Gherdëina
L Schi Club Gherdëina nvieia ala prejentazion dla scuadres, n dumënia ai 21 de dezëmber
N se anconta dala 17:30 sun plaza de S. Antone, tla ncrujeda cun la streda Petlin a Urtijëi, per jì duc de­berieda nchin sun pla­za Stetteneck, ula­che l unirà prejentà la scuadres de duta 
la disciplines sporti­ves, i:la alenadëures, i spon­­sëures y sambën l cudejel dl ann nuef. 
Duc ie nviei de cuer!

Garejedes de schi te Gherdëina
La Lia di Filatelisć, numismatics y vedla chertes se prejënta tla sales dl Tublà da Nives cun na mostra dedicheda ala garejedes de schi che ie states te Gherdëina
La giaurida dla mostra ie n vënderdi ai 12 de dezëmber dala 16.00. 
Sce la prima garejedes de schi fova unides metudes a jì bele l ann 1908, pona à dessegur la »Via Adunata dei Valligiani« dl ann 1925 na gran mpurtanza. 
Do avisa 100 ani vën chësta prima garejeda naziunela te Gherdëina documenteda cun fotografies y articui dla zaites da ntlëuta. Na gran lerch giapa i Campiunac dl Mond dl 1970 y la storia dla garejedes de Copa dl Mond. L ne mancerà sambën nia la finela paralela dan 50 ani da Ronc ju.
N ucajion dla giaurida saràl nce mesun giapé l stempl speziel dla Posta.
La mostra resterà davierta nchin ai 15 de jené 2026, uni di dala 15:00 nchin ala 19:00. N la Ueia de Nadel (24.12.), n San Silvester (31.12.) y de lunesc iela stluta.