La Usc di Ladins

Önesc scuadres da 3 cina 4 porsones á tut sö l’invit dl Consëi de formaziun d’Al Plan y á tut pert ala secunda ediziun dl quiz d’ostaria, "pub quiz" tl jargon internazional, olache ara nen jô da mosoré le savëi y les conescënzes dla cultura y tradiziun locala, mo nia ma. Por chësta ediziun nöia, tignida sciöche l’ann passé tla chidlara a Runcac, á le Consëi de formaziun arjigné jö indöt 30 domandes, olache an podô arjunje cina 45 punc. La maiú pert dles domandes ê a resposta sëcia; pro val’ öna podôn s’la cavé da sciazé y pro d’atres êl da induné la dërta resposta danter cater poscibilités. 
Zacotan de domandes ê pa bëgn scialdi saurides, canche an messâ cumpedé sö i mëmbri dla junta marora o le personaje che i dá l’inom ala biblioteca de paisc. Plü rî êl bele da atoché avisa la zifra de tan de canuns che al é sön la tëmpla de Cianross y Piz de Plaies, o tan de porcënt de spersa che le bosch tol fora tl comun de Mareo, o ciamó da stomé ciun che é le ciampaní plü bas te döt le Comun. Por la cronaca: al é chël da Pliscia: le Consëi de formaziun é jü cun n tecnich a mosoré do avisa.

Co che ara é jüda fora, podëise lí t’La Usc di Ladins di 12 de dezëmber  (pablo)