La Usc di Ladins

"La sajun da d’invern 2025/26 de Dolomiti Superski é piada ia te na manira straordinara", mët man la comunicaziun dl Dolomiti Superski menada fora ai 2 de dezëmber. Püc dis denant, la sabeda ai 29 de novëmber, êl pié ia la sajun dai schi te plü raiuns dl comprensor, che á lascé registré 42.000 pröms ingresc y 540 mile passaji söi implanc. N plus dl 6% respet ala pröma fin dl’edema dl ann passé.
Danter chi che á daurí tla Val Badia êl sambëgn Plan de Corones, che fej vigni ann da "deurapista" por la sajun frëida. Por mirit dles temperatöres basses gnüdes les döes edemes denant ti ésera garatada da fá sö munts de nëi y insciö ince da daurí cotan de pistes. D’Al Plan sö él gnü daurí düc i implanc dal Miara cina söinsom Plan de Corones y arjigné dötes les pistes prinzipales de Miara, Col Toron, Pre da Peres, Costa y les döes variantes dla "Ruis" la nr. 9 y nr. 12. Ma ti pröms dui dis él gnü fat incër 60 mile passaji, nes diji pro la Sozieté di Lifc d’Al Plan.
Ai 29 de novëmber á daurí en chësc ann ince le skilift "Baby La Crusc" a Badia y le de do l’implant nü "La Crusc 1", che i un presenté tla ultima ediziun. La sajun tl’Alta é piada ia spo indortöra la jöbia ai 4 de dezëmber cun 34 implanc y 57 km di 130 de pistes y daverta ê ince la roda dl Sela.
L’Alta Badia se presentëia chësc invern cun trëi implanc nüs. Dlungia l’implant nü "La Crusc 1", él la sozieté Impianti Colfosco che pó inaudé y benedí rodunt chësc vëndres a Calfosch le lift "Forcelles": l’implant cun scagns da 6 posć é gnü fat sö dala dita Leitner y condüj sö a munt 2.600 porsones al’ora. Chësc é 200 deplü co l’implant vedl, che ê n lift a scagns da 4 posć.

Deplü podëise lí t’La Usc di Ladins di 12 de dezëmber  (pablo)