La Usc di Ladins

De n tru dla roda, che coliëia la Val Badia cun la Val de Puster, nen vëgnel baié da passa vint agn incá. Cina sëgn éra ma jüda da realisé n tru che vá da Piculin cina Longega; tru che é indere gnü danejé dala tampesta Vaia y che messará gní dortoré por podëi indô gní anuzé dai ziclisć. Tl comun de Badia él te chisc vint agn bele gnü fat deplü proiec, mo cina incö n'él nia gnü ciafé na soluziun azetada da düc, en particolar dai paurs y dai patruns di grunc olache le tru dess passé. La popolaziun se damana indere chësta infrastrotöra, che é ince dër importanta tignon cunt dla mobilité dl dagní, che dess ester tres plü sostenibla. Insciö á la maioranza di mëmbri dl Club dles Rodes manifesté la orenté, tres n sondaje intern, de avëi n tru dla roda fora por la Val Badia; ince dala inrescida sön la mobilité - inviada ia dal comun de Badia adöm cun le Ökoinstitut - él gnü fora che le 90% di partezipanc se damana n tru por jí cun la roda. Tl comun de Badia él gnü metü sö n grup de laur por la mobilité cun la roda, che se dá jö bele da n ann incá cun chësta chestiun. Dl grup fejel pert deplü aconsiadus, ince dla oposiziun, y a ce él le vize ombolt Christian Pedevilla.

»Sëgn che l'Alta Badia é gnüda portada ite tl plan por la mobilité cun la roda dla Provinzia da Balsan y che la trassa Bornech-Cianacëi é gnüda inserida tla rëi di trus dla roda de 'BicItalia', él le dër momënt da jí inant cun chësc proiet«, dij le vize ombolt. 

I ti un fat na intervista che i podëis lí tla ediziun stampada da incö, vëndres ai 13 de ma.   (kp)