La Usc di Ladins

Paul Zardini romagn te nosc recort y te sü scric, por la maiú pert lirics, desco porsona enteletuala y enteressada ai fac dal monn y al destin de nüsc paisc ladins y nosta jont.
De ël él da ciafé na desëna de publicaziuns con poesies ladines, mo nia ma ladines: ince todësces y talianes. I temesc che al trata te sü scric é trec y desferonc, gonot vëgnel dant ince la fede y la spiritualité. Söes poesies é caraterisades da en stil poetich lëde y da na onomatopea de morvëia co cheriëia gran ritm y dinamizité. Tresfora él da sontí danter les risses na ona de ironia fina.

Söa vita en cört
Paul Zardini ea gnü al monn ai 4 de messé 1950 a Pedraces de Badia y ea corsciü sö a Al Plan de Mareo, olache so pere ea secreter de comun. So pere ea gnü da Anpezo ca, söa oma Ida Zardini Oberbacher ea dal Lehrer a Al Plan.
Paul Zardini â fat do la scora elementara a Al Plan, la scora mesana a Bornech y spo le ginase por le comerz a Balsan. Do la matura êl jü a lauré por mez ann tla industria famazeutica a Milan, do avëi fat le sorvisc militar âl avié söa cariera tal ciamp comerzial: empröma por dui agn y mez a Urtijëi, dal 1974 al 1976 desco secreter comerzial pa en conzern de ortam y ordöra a Stuttgart.
Dedô ea sü jobs stês deplü y desvalis, danter l’ater ince pa na fujina da mecanich y pa na fossenara, y pa en fabricant de ores.
Paul Zardini â motü man da scrí poesies t’ospedal da Bornech al’eté de 30 agn, do en inzidënt albü con l’auto. Dal 1980 al 1981 â Paul ciamó lauré desco diretur d’en magazin de na firma comerziala a Porsenú.
Da plü agn encá ea Paul Zardini tla Ciasa de Palsa a San Martin de Tor. La sanité, con chëra che al â albü da sćiampí dandadöt tai ultimi 40 agn, ierâ da Paul trepa pazionza y crëta tal aiüt de jont y te Dio. Encö da doman, ai 15 de novëmber 2023, âl lascé cösta tera.

Na söa poesia

Morí

Al mo jêr, tla coscionza
y tal cör, al é en amí co mör. 
I ponsi a mia vita, dërta o rodosa,
superstiziosa, massa trep, o püch curiosa.

Canch’al sará gnü mia ora, massa tert, 
o massa adora? Tan dio él pa ch’i mo 
enfasci les plaies, tratan che tö, amí, 
scraies y chërdes con en fi de usc, 
che al te sidi tuta la crusc? 

Tö ne gnaras bën nia plü tan adora 
sön cösta tera, olá che iu mëssi 
condüje ennant mia vera, mo sogü
sunse ch’i pordüji ince iu 
da gní metü sot a tera.