La Usc di Ladins

Dai 6 e i 10 de mé zirca 100 joegn da duta Europa i se à binà a Trent per la fasa finèla del projet internazionèl »School Beyond Regions and Borders« (Scoles sorafora raions e confins), che te chest an l à tout ite 23 Scola autes de 9 Paijes europeans. Ogne clas che à tout pèrt al projet l’à lurà fora ti meisc passé projec multimedièi su temes specifics desche l’alimentazion o l respet di deric de la persona, che i studenc à prejentà endèna la radunanza plenèra en mercol ai 8 de mé te la senta de la Region Trentin Sudtirol a Trent, a chela che à tout pèrt, de persona o online, ence Istituzions emportantes de nesc teritories, desche l President de la Provinzia de Busan Arno Kompatscher e l ombolt de Trent Franco Ianeselli, apede a dozenc e publich enteressà.

La Scola Ladina de Fascia, che da trei egn con si studenc la é protagonista del projet continental de Educazion zivica e zitadinanza, co la clas 3 LSB del Liceo scientifich l’à portà dant n percors de reflescion sul ‘Hate speech” (Descors de odie), fenomen che aldidanché tol ite n muie de joegn e gregn, soraldut su la piazes digitèles di Social network.

De più su La Usc stampèda de en vender ai 17 de mé.  (Thomas Zulian)