La Usc di Ladins

Al ê n pü’ do mesa les cater, canche la sirena di stödafüch á soné por dé alarm. En domënia ai 4 de jená á i stödafüch messü se mëte sön tru por destodé n medefüch, sbroché fora sön na ütia tla munt de Pra­longiá. Pro la strotöra de privac á la tramadöra de tët pié füch, pian ia dal ciamin surascialdé. 
A dé alarm sciöche pröms é stá ostis dles üties vijines. Sön chël s’á ativé le socurs sön pista dl Piz Sorega, che á por pröm conscidré la situaziun y descrít le stat dla strotöra en flames ales scuadres de volontars di stöda­füch, canche chisc ê ciamó te ma­gazin. A chisc ti aspetâl n tru n pü’ atramënter en chësc iade; ciamó plü important êl porchël da avëi para la dërta massaria. Drioman éra jüda da arjigné ca mesi maius y da mené sö, tres les pistes, i stödafüch di paisc da La Ila y de Badia, ince rová adalerch, sciöche i carabiniers da La Ila. Indöt él sté en aziun passa 50 volontars y socoridus, danter chi che é rová pro ütia y chi che é restá a pe dl implant portamunt Piz Sorega por arjigné ca y mené sö atrezadöra aladô. 

»Ara se trata de na sort de intervënt valgamia particolar, che ne sozed nia gonot. La dificolté maiú é chëra da rové aslöm daimpró al medefüch, passan fora por pistes valgamia plënes«, cunta le comandant Devis Crazzolara. 
Passa döes ores á doré l’intervënt, che s’á stlüt jö bun. 


Deplü informaziun ciafëise da lí tla ediziun nöia de vëndres, ai 9 de jená!