La Usc di Ladins

Incër 125 assistis y acompagnadus di salfs protezioná y di sorvisc de acompagnamënt dla Comunité Comprensoriala Val de Puster é rová adöm ai 12 de ma tla Intercable Arena da Bornech, olache al é gnü desfiré la Festa di jüc y dl sport 2026. L’organisaziun é gnüda surantuta chësc ann dal zënter sozial "La Spona", che á ince podü cunté sön l’aiüt de n grup de volontars di Stödafüs d’Al Plan y ciamó d’atri che s’á metü a desposiziun da gní a daidé para por chësta ocajiun particolara. Danter i partezipanc êl assistis di zëntri soziai La Spona, Trayah, Biedenegg y Türesc, dla "Kunstwerkstatt Akzent", dla "Reha–Werkstatt", dl Öko–Service, dl Sägemüllerhof, dla strotöra "Autism" y dl sorvisc "Arbeit+". Dales 9 da doman inant s’ái mosoré te na dërta cumpëda de jüc, metüs adöm dal maester de ginastica Markus Winkler, olache ara nen jô de abilité y de condiziun y alüsc ince ma de fortüna. I jüc ê düc conzepis a na moda che ai fajess ligrëza y che ai sostigniss l’ativité deboriada. Al n’á porchël nia mancé le devertimënt y les riüdes, moscedá cun na bona porziun de concorënza sana.

Deplü ciafëise t’La Usc di Ladins di 5 de jügn  (pablo)