La Usc di Ladins

Ala incuntada a Al Plan á tut pert rapresentanc dl turism, dl Comun y ince dla comunité ladina. Te n comunicat mené fora incö, lion che "i rapresentanc dl turism á dé pro de avëi sotvaluté la faziun emozionala y culturala dl’esclujiun dl inom ladin. Al i desplej da avëi ofenü jënt te so lian cun le lingaz y süa cultura. Tl medem tëmp ái splighé i obietifs strategics dla posiziun nöia: fá gní le raiun de vacanza plü visibl y conesciü a livel internazional. Ai s’á mostré contënc che la strategia ala basa y le dessëgn grafich dla nöia merscia ais ciafé aprijamënt. Paré zoruch l’identité ladina n’é mai stada l’intenziun."

André Comploi, che á tut pert ala incuntada sciöche zitadin ladin, á dit: "Da me infora s’á l’incuntada svilupé te n confrunt dër costrutif. Al é gnü fora tler che al n’ê degüna ria intenziun da lascé demez l’inom ladin. Tl medem tëmp él sté comprenjiun y acordanza sön le fat che ara ne se trata nia ma de n inom’ o de n logo, mo ince dla identité linguistica y culturala dla mendranza ladina. Düc i presënc á reconesciü le bojëgn da ti dé visibilité al’inom ladin tl logo y se dará da fá de chësc vers, ti proscims vari che an á fat fora. Particolarmënter m’á fat plajëi le spirit cun chël che l’incuntada s’á stlüt jö: ara ne nen vá nia da mëte lingac o grups un cuntra l’ater, mo de n respet reziproch, de aprijamënt y la responsabilité deboriada por nosta diversité culturala." Sciöche diretur por la Formaziun y la Cultura Ladina de Südtirol, porta ite Comploi na gran espertisa.
La domanda da tó ite indô l’inom ladin de Plan de Corones, gnará portada dant tl grëmo competënt dla merscia turistica. Te chësc grëmo é rapresentades dötes les organisaziuns turistiches dl raiun y ince i rapresentanc di implanc portamunt. Werner Call, presidënt dla Cooperativa Turistica Al Plan/San Martin, dij insciö: "Incö unse avisa aldí che Plan de Corones é por tröpa jënt n toch de patria. I me portará ite tl grëmo de dezijiun, adöm ai presënc, por che l’inom storich ladin ciafes indô so post tl logo. Por chësc orunse lauré fora n tru sostenibl, por sodesfá döt le raiun de vacanza".

Nia inultima á i partezipanc fat fora da mëte sö n grup de laur cun rapresentanc dl turism, dl Comun y dla comunité ladina. Chësc grup dess lauré fora propostes concretes sön co che le lingaz y la cultura pó ti gní trasmetüs miú sides ai ghesć co ince ala popolaziun dl post. Tla incuntada él ince gnü fora che al mancia tl raiun turistich de Plan de Corones na dërta conescënza reziproca. "La discusciun via desmostra ci valüta che le lingaz y sü inoms tramaná á por la jënt. I orun porté ite chësc liam tl laur deboriada y porté pro che nosta identité sides da odëi y via", dij le comandant di Scizeri da La Pli Michael Ploner. Le confrunt á desmostré che ince cun punc d’odüda desvalis, á i partezipanc la medema intenziun: n raiun te chël che la jënt se reconësc ince cun so lingaz y süa cultura, y olache ai cheriëia deboriada le dagní turistich."