La Usc di Ladins

En sabeda ai 31 de otober él gnü cherdé les unités dl Aiüt Alpinisć Alta Badia, sciöche i stödafüch da Corvara y chi da La Ila por n intervënt che an ne vëiga nia vigni de.
A Corvara tl plan dlungia le stadion dla dlacia, n post chirí dantadöt da chi che jora cun le parapënt sciöche post de arsida, á n ël porvé da dé sura. L’arsida ne ti é nia cis garatada ala porsona che é restada tacada pro na gru de n cantier daimpró al post d’arsida. L’ambrela y i fis dl parapënt s’á lubrí incër le brac dla gru ia, architan l’ël tl’aria a n’altëza de zirca 15 metri da tera.
Sön le post é rová i socoridus dl Aiüt Alpinisć Alta Badia y i stödafüch da Corvara. Por arjuinje l’ël él gnü cherdé i stödafüch da La Ila cun le camion dala litra, tratan che al é gnü improvisé na suraspersa murjela sot ala porsona tl caje che ara ess podü se destaché dala gru.
Scebëgn che l’intervënt sides sté val’ de nü por les scuadres de socoridus, éra jüda da porté te püch tëmp la porsona indô a tera, zënza atres complicaziuns; gnanca le parapënt n’é gnü danejé.


Deplü noeles cörtes ciafëise da lí tla ediziun nöia de vëndres ai 6 de novëmber!