La Usc di Ladins

Linert Irsara de Badia é n möt de Merch Irsara, che â maridé Maria Piccolruaz (1910 – 1992) da Alfarei. I geniturs â trat sö ciamó Vinzenz (mort da pice), Iaco, Pire y la möta Giuvana. Linert messâ da möt vardé la vacia sö por bosch o te gomina; al á ince fat le famëi a Alfarei sö por Col d’Ancona, Plan Parvacia, Pera Spizosa, Plan dles Cornidles. Linert é jü a sorví a mëssa dala 3. classa insö n gröm d’agn; dailó imparâl a conësce nia ma deplü proi, mo ince d’atri mituns de Badia. Rovada la scora, tocâra da jí a imparé valch; por caje á Linert lit tl foliet che an chirî a Maran n jonn por imparé da lié libri y ciarié ite cuadri; chësc laur i ess plajü a Linert y insciö él jü a Maran. Al abitâ tla ciasa di lerneri y dailó ciafâl ince le mangé; ince so fre Iaco é rové a Maran a imparé sartú dala firma Dubis y é taché laite. Linert á trëi agn imparé da lié libri dala firma Egger a Maran.
Le laur da liadú de libri foss ma sté n laur por ocajuns, deache chi agn êl ma la biblioteca, val’ curat y Comun che lasciâ lié zacotan de documënc y libri. Canche le pere de Linert s’â dl 1967 amaré y â lascé da fá le postin, s’â Linert ponsé che chël foss bëgn n laur plü sigü y che portass ince deplü, êl pö n laur statal. Jí cun la posta n’ê nia n ri laur, mo un adorâ de bogn cialzá da jí a pe da na vila al’atra. Canche Linert é do trëi agn gnü da Maran fora, ál metü man da fá le postin. Linert â ince ciafé interes y ligrëza da jí pro la Müjiga de Badia a soné le clarinet; chësc laur ál metü man dl 1964 cun 19 agn, apëna che al é gnü da Maran fora; chësta ota pol festejé le bel iubileum che al é 60 agn pro la Müjiga de Badia, n record che püc arjunj. (Lois Trebo)

Deplü sön la vita de Linert Irsara podëise lí t’La Usc di Ladins di 10 de ma