»Nëus litadëures saron totli, ma nia totli defin!«

Data

27 de otober 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Prefazion: unfat, sce n ie śën per un n partit o l auter, ma coche la Jonta de Chemun de Urtijëi ie unida metuda adum va ora de uni logica, senificat de cunlaurazion y bon fundamënt.
Dan, ntan y do la veles iel da nëus te familia unì rujenà truep dla tematica. Dantaldut nosc mutons se à fat, deberieda cun nëus genitores, nia puec pensieres, fajan nce truepa dumandes. Riesc do la veles sons jic a nriescer chiche à giapà tan de stimes. L bunder de coche la Jonta fossa unida metuda adum fova danz grant. Ma do che on pona audì de coche la Lista Unica se à »permetù« de mëter adum si »team«, ne tulan nia n cunscidrazion la stimes che i litadëures ti à dat al auter partit, sons, a dì puech, restei cun la bocia suta. La dumandes che nosc mutons se fajova danter ëi y a nëus genitores, fova de coche l possa al ambolt ti vester unfat dla gran cumpëida de stimes y dla crëta che la jënt ti à dat ai candidac dla SVP!? »On for audì,« dijova nosc mutons, »che Tobia dëssa vester na persona che cëla de ciafië cun duc. Ma coche l à fat chëst iede, cunlauran – mé per avëi la maiuranza – cun un che à giapà mé 67 stimes, chël nes sà l »colmo«! Co possa pa valëi la 1.740 stimes de doi candidac demanco che 67 stimes?«
Un de nosc mutons me à fat chësc ejëmpl: »L ie sciche sce n jissa te n restaurant a maië, n giapëssa l menù, n chirëssa ora cieche n uel maië, ma ala fin giapësses dut zeche d'auter sun mëisa, cris ora dal patron dl restaurant, dal cuech, dal ciulier, da chël che leva ju, dal'ëila che ruma su y da n cunsulënt da oradecà. Pu pona, sce la ie nscila, ciuldì me porti pa n menù, sce ala fin muessi mpo mo maië cieche i autri uel?«
Y sun na tela se fej la politica mo pensieres y dumandes de ciuldì che i jëuni y n generel tan puecia jënt va a lité. Perdrët iel bën logich sce i litadëures muessa udëi che si stima ne vel ala fin na »pipa de tabach«. O, dit autramënter: sce la cumpëida matematica ie ala fin mé n pont de ududa y ne à deguna logica. Dantaldut i jëuni pënsa mo te na maniera tlera, rëidla, nia ntrigheda, zënza nvidies y zënza pensieres »dopli«. Propi ëi tol ca i resultac dla veles, ti cialan sciche a n calcul matematich, y avisa perchël ne capësci nia ciuldì che doi persones, che à deberieda giapà passa 1.700 stimes, ne possa nia lauré pea te na maniera costrutiva per l bën de nosc bel luech.
Ala fin de truepa descuscions fans duc a una che ne ulessan mei vester tla pel de chëla persones che ie respunsables de coche l ie unì fat, menan śën l Chemun, zënza avëi tëut n cunscidrazion la stimes de na grandiscima pert di litadëures de Urtijëi. Perdrët na tëuta per l cul! Chësc porta do nosc ntënder mé rie sanch y ie scialdi dalonc da ideologies democratiches. Pona possa chiche uel śën nes dì che dut ie suzedù do la leges dl Stat; dut bon y drët, ma da fundamënt ne n'iel segurdenó unì fat.  (Egon Bernardi cun familia, Urtijëi)