La Usc di Ladins

La magia dl baroch
Festival Badiamusica: ai 20 d’agost él le »Duo Bieber« che porta dant a Corvara les »maestries baroches por fabló y cembalo«
Le festival Badiamusica pîta en mercui ai 20 d’agost dales 20:30 n conzert te salf dles manifestaziuns da Corvara. Sön paladina podarán aprijé le förtl musical dl »Duo Bieber« cun Vera y Patrizia Bieber, che porta dant le conzert dal titul »Le Baroch magich: maestries por fabló y cembalo«. An podará porchël aldí toc che alza fora le monn sonur afascinant dl Baroch – n monn che é caraterisé da na gran varieté de caraters y umors. Te chësc program ves aspeta sonates virtuoses y variaziuns plënes de fantasia de Johann Sebastian Bach, Georg Philipp Telemann y Jakob van Eyck. La jona Vera, che sona le fabló, y süa so Patrizia, che sona le clavicembalo, ves portará fora por la sëra cun na presentaziun dala bona löna y ves fajará fá n iade tl monn magich dl Baroch.

Musiga y proieziuns
Badiamusica y SMACH pîta na serada tl Museum Ladin, ai 22 d’agost, cun musiga folk y classica, musiga eletronica y proieziuns
Tla cornisc dl Festival Badiamusica, él en vëndres ai 22 d’agost dales 18:30 n conzert tl Museum Ladin a San Martin de Tor. Sot al titul »Folk meets Classic« sonará le »Trio Anthelia« cun Agnes Mayr (fabló), Katharina Hauf (corn) y Olivia Neuhauser (erpa). Dales 20:00 vára inant cun la cëna, dales 20:30 vëgnel mostré »Prato Bello« de Paolo Vinati, che ofrësc na imaja intima dla vita da vignidé te n paisc da munt; dales 21:00 vëgnel mostré le film »Nauz«, olache Jochen Unterhofer y Florian Geiser esplorëia la poesia de Roberta Dapunt, acompagnada dales musighes de Eduard Demetz. Dales 21:30 él l’artist multi­medial y musizist ladin Tobias Tavella che presentëia dal ví na performance eletronica.

»Ci messasson pa fá te chësta vita?«
Chësc le titul dl conzert che stlüj jö le Festival Badiamusica, en mercui ai 27 d’agost dales 20:30, te dlijia de Badia
Pro chësc conzert sona y cianta le grup »Ensemble &Cetera« cun Ulrike Hofbauer (sopran), Julien Freymuth (countertenor), Jan Fadri Hofstetter (tenor), Jorge Mar­tinez Escutia (bas), Marie Bournisien Double (erpa) y Simon Brandlechner (orghe). Le titul dl program dl conzert vëgn dal motet de Chiara Margarita Cozzolani »Quid, miseri, quid faciamus in hac vita« – Ci messasson pa fá nos miserabli te chësta vita?«. Chësta do­manda atuala ê bele tla mënt dla jënt dl XVII secul y é gnüda trasformada da Cozzolani te n dialogh artistich danter Maria y i fedei. La musiga conservada conscidrëia Cozzolani sciöche öna dles componistes milanejes plü importantes amesa le XVII secul.

Le museum SÖN le ce
Le Museum Ladin inviëia al laboratore creatif »Le museum SÖN le ce«, en mertesc ai 19 d’agost dales 10:00 ales 11:30, tl MusLa Ciastel de Tor a San Martin de Tor
Adöm esplorunse le ciastel por fá spo n iade imaginar ti ogec metüs fora y cherié nosc museum da condüje a ciasa… SÖL ce. 
Le laboratore é por mitans y mituns dai 4 ai 8 agn. Le cost de partezipaziun é de 5,00€ a ce. Tó pert pó max. 15 mitans/uns. I periun do na prenotaziun ala misciun e–mail prenotaziuns@museumladin.it o al numer de telefon 0474 524020.

Saus te plaza a Calfosch
Spezialités gastronomiches y n spetacul
En mertesc ai 19 de agost dales 17:30 inant vëgnel metü a jí la manifestaziun »Saus te plaza«, sön plaza de dlijia a Calfosch. Por l’ocajiun gnarál tigní na de­­gustaziun de spezialités gastro­nomiches, arjignades ca da deplü eserzizi dl paisc: bales duces, pössl, tutres, fortaies, mo ince panins cun farina de cia­napia y le panin dl iagher cun liagna. 
La manifestaziun vëgn acom­pa­gnada dales melodies dl grup »Rise o’Clock«. I partezipanc po­dará ince amiré le grup »Ne­tores« che jora cun les ambreles y fajará na picera esibiziun tl cil. Sce al foss bur’ tëmp, vëgn la manifestaziun spostada ala jöbia 21 de agost.

»I jun a munt« a La Val
Na escurjiun por descurí les tradiziuns y i laurs da paur da zacan
En domënia ai 17 de agost vëgnel metü a jí a La Val la manifestaziun »I jun a munt«. En chësc de án la poscibilité da conësce les tradiziuns, la spëisa y i laurs da paur da zacan. L’escurjiun fora por i pra de Ciavaza y Rit mët man dales 9:00. An pëia ia da Spëscia, olache an pó lascé l’auto cun prenotaziun, o scenó vëgnel pité n sorvisc de transfer dal zënter dl paisc dales 8:30 ales 10:30 y domisdé por gní zoruch dales 16:00 ales 18:00. Fora por la roda pón odëi i laurs da paur che gnará mostrá pro les döes staziuns dla uniun di paurs y dla jonëza da paur. Ai mostra sciöche al vëgn sié cun la falc, sciöche al gnô restelé y dötes les massaries che an adorâ. Te trames les postaziuns vëgnel dé fora da mangé y an ciafa liagnes sfomiades, cioce y ciajó cun pücia y ince strudl da pom. I esperc dla Ciasa dl Parch Natural porta dant te sües döes sta­ziuns didatiches plü tematiches che reverda les Dolomites, i pra da munt y la biodiversité; pro la staziun dla Musiga ciafon cajincí t’ega cun farina de vaines. Le cor dles ëres acom­pagnëia i partezipanc cun sües melodies fora por döta la roda y pro vigni staziun sarál ince musiga dal ví.

De di corëc
Le Museum Ladin inviëia al »De di corëc«, en vëndres ai 22 d’agost
Le program dl de porta danmisdé, dales 10:00 ales 12:00, tl Museum Ladin Ciastel de Tor, olache le paleontologh Herwig Prinoth porta, cun na vijita menada, fora por la mostra »Countdown to Mass Extinction?«. Domisdé vá le program inant söl Ju de Börz cun la escurjiun menada. Le prisc de partezipaziun é de 15€. La prenotaziun é obligatora, da fá por mail a prenotaziuns@museumladin.it o por telefon al 0474 524020. Informaziuns menüdes ciafon sön la plata internet www.museumladin.it.