La Usc di Ladins

Podëise cunté co che al é nasciü l’idea da mëte a jí na gara de Copa dl Monn tl’Alta Badia?
L’idea nes é gnüda n de che i jô cun le vedl implant sön Piz La Ila adöm a Moritz dl Club Moritzino. Te chi agn adorân apresciapüch 20 menüc por rové sö y danter na ciacolada y l’atra me dij Moritz: "Sön chësta pista y cun l’esperiënza che tö as, ne fossel nia bel da mëte a jí na gara de Copa dl monn?" I ti á respognü che al â rajun, che i m’ess informé por capí co che an ess podü fá. Atira ái spo baié cun d’atri amisc y cun Erich Kostner, pionier y proprietar di implanc, por capí sce al foss sté la desponibilité dla pista.

Co él pa sté meso che la FIS ves á spo

• Marcello Varallo. (Foto: Mattia Davare)
•  

View the embedded image gallery online at:
https://www.lausc.it/valedes-ladines/val-badia/30904-n-some-che-e-devente-realte#sigProId362606e507

surandé na gara de Copa dl Monn?
I conesciô Serge Lang, le fondadú dla Copa dl monn. Tl 1973, canche i fajô gares de copa dl monn, m’él gnü tut demez la medaia de brom te na discesa, che ti ê gnüda dada a n ater atlet. Do deplü discusciuns y valutaziuns á Serge dé pro che al ê gnü fat n fal y al m’â impormetü che n bel de s’essel fat pordené le tort. Canche i sun jü a damané sce al foss sté meso da ciafé na gara. m’ál dit che al ne podô nia nes dé atira na gara de copa dl monn, mo che i esson podü organisé le pröm Super–G dla storia dl schi. Insciö unse metü a jí dl 1982 na gara de Super–G sön la pista Altin. Chësc se á dé spo la sbürla da rové ite dl 1985 tl calënder dles gares de Copa dl Monn, cun n slalom lerch i dis dan Nadé.

Ciodí él pa gnü chirí fora i dis dan Nadé da tigní les gares sön la pista Gran Risa?
La dezijiun dles dates n’é nia n caje, mo i un ciaré da se coordiné cun d’atres gares importantes sciöche Gherdëna y Val d’Isère. L’obietif ê chël de ciafé na data che podess deventé na tapa tradizionala, che restass tl calënder dla Copa dl monn.

Ciügn é pa stá i pröms vari por l’organisaziun dla pröma ediziun dla Copa dl monn sön la Gran Risa?
Por pröm unse metü sö n comité cun rapresentanc de düc i paisc. Hubert Dalponte é deventé le pröm presidënt y iö le pröm diretur. Bele da atira unse dit che la manifestaziun ne podô nia ma ester de un n paisc mo de döta l’Alta Badia y chësta é ince la rajun che á porté al suzes dl evënt. L’Alta Badia, cun la pista spetacolara y tecnica dla Gran Risa, y dër aprijada da schiadus y alenadus, é te cört tëmp deventada na gara de prestisc sciöche Kitzbühel, Wengen, Adelboden y Garmisch.

Co se á pa svilupé les gares de Copa dl monn cun le tëmp?
A livel de pista él gnü fat mudaziuns sciöche por ejëmpl la realisaziun dles "Gobes dl Giat", mo ince la preparaziun y le livel tecnich á albü n gran svilup fora por i agn. La manifestaziun é ince chersciüda dassënn sciöche spetacul, che gnô spo mostré a livel televisif tres les imajes realisades da regisć conesciüs sciöche Enzo de Pasquale dla RAI. Ma giulan al aiüt di tröc volontars y de n spirit de comunité éson stá bogn da mëte a jí vigni ann la gara de Copa dl nonn, adinfora de un.

Ciüna é pa tüa plü gran sodesfaziun ciaran ai 40 agn de storia dla Copa dl monn?
La plü gran sodesfaziun é stada chëra da odëi che l’Alta Badia é rovada ite tl’élite dla Copa dl monn; nia ma sciöche ex atlet de schi, mo suradöt sciöche n mëmber de na comunité che á cherdü te n some che é deventé realté.