La Usc di Ladins

Crëps danter mit y cumerz – mostra coletiva
Temui, dejidrei y adurvei! Co muda pa la relazion y la maniera de pensé dla persona la cuntreda da mont? Cun chësta tematica se dà ju la mostra coletiva tla galaria Vijion a Puntives; la giaurida ie ncuei da sëira dala 18:00
Giut alalongia à la persona schivà la cuntreda da mont. La fova ncompra, da tëmei y nia saurida da lauré. Chisc monc misteriëusc y nia cunesciui à desceda truepa fantajies, che se à furmà te d’uni sort de mic y lijëndes. 
Danter respet y tëma òven mpo mo l bunder de scuvierjer i crëps y cun l turism y l’arpizedes iel unì majera la ueia de udëi chësta lueges da mont. I abitanc dla montes à judà do a fé unì for plu y plu jënt, pervia dl profit. Ma l gran svilup turistich ie ntant deventà n dann ala cuntreda da mont zitia y sensibla. La marueia, ma nce l destin dla montes uderàn ti lëures de Elisabeth Frei, Gotthard Bonell, Erich Erler, Rolf Bakalla, Pante Demetz, Claudio Costantino Tagliabue, Konrad Pe­trides, Gregor Prugger y Leonhard Angerer. Ala mostra puderàn ti cialé dai 23.08. nchin ai 13.09., for da lunesc nchin sada, dala 16:00 ala 19:00.

Mostra »Fragmenta«
L Circolo–Lia Mostra d’Ert nvieia ala mostra dla trëi artistes Rebecca Korb, Melanie Schindler, Katharina Schreiter. La giaurida sarà n vënderdi ai 29 de agost dala 19:00
Rebecca Korb, Melanie Schindler y Ka­tharina Schreiter ie n coletif de ert de Leipzig. Ëiles lëura ora mostres tematiches cun opres desfrëntes ndividueles. Tla mostra dal titul »Fragmenta« vàla de formes desfrëntes dl pierder, de na memoria cun fai, dla vijion nia cumpleta ma nce dla puscibltà dla tras­furmazion te de strutures nueves. Te si lëures vëniel mustrà coche chësta strutures possa jì n flistra tres la forma visuela ma nce tres la idées dovia. Nscila ie la opres me­tudes adum da materiai y media desfrënc che taca adum te na nstalazion sëula.
La mostra resterà da udëi nchin ai 21 de setëmber, dal merdi nchin dumënia dala 16:00–19:00 y de sada y dumënia nce danmesdì, dala 10:00–12:00.

Musiga y proieziuns
Badiamusica y SMACH pîta na serada tl Museum Ladin, ai 22 d’agost, cun musiga folk y classica, musiga eletronica y proieziuns
Tres le Festival Badiamusica, él en vën­dres ai 22 d’agost dales 18:30 n conzert tl Museum Ladin a San Martin de Tor. Sot al titul »Folk meets Classic« sona le »Trio Anthelia« cun Agnes Mayr (fabló), Katharina Hauf (corn) y Olivia Neuhauser (erpa). Dales 20:00 vára inant cun la cëna y spo n program de SMACH: dales 20:30 vëgnel mostré »Prato Bello« de Paolo Vinati, che ofrësc na imaja intima dla vita da vignidé te n paisc da munt; dales 21:00 vëgnel mostré le film »Nauz«, olache Jochen Unterhofer y Florian Geiser esplorëia la poesia de Roberta Dapunt, cun musighes de Eduard Demetz. Dales 21:30 él l’artist multi­medial y musizist ladin Tobias Tavella che presentëia dal ví na performance eletronica.

Ultim conzert dl festival Badiamusica
Le Festival Badiamusica 2025 vëgn stlüt jö en mercui ai 27 d’agost dales 20:30, te dlijia de Badia, cun l’orghelist Simon Brandlechner
Pro chësc conzert ess messü soné le »Ensemble &Cetera«, mo al é sté na mudaziun de program. Al sará insciö n conzert cun l’orghelist ladin Simon Brandlechner. Sön l’orghe dla dlijia de Badia portarál dant la »Sonate nr. 6 in G–Dur, BWV 530« y le »Praeludium und Fuge in G–Dur, BWV 541« de Johann Sebastian Bach. Al sará da aldí la »Toccata septima from ’Apparatus musico–organisticus’« de Georg Muffat, le »Vater unser im Himmelreich« de Dieterich Buxtehude, la Partita »Wer nur den lieben Gott lässt walten« de Georg Böhm, »Schmücke dich, o liebe Seele« de Gottfried August Homilius, sciöche ince le coral »Was Gott tut, das ist wohlgetan«.

»mostra & aperitif« tl Museum
Le Museum Ladin inviëia a »mostra & aperitif« cun acompagnamënt musical de »!nes y Sofia«
En jöbia ai 28 de agost pita le MusLa Ciastel de Tor vijites menades fora por la mostra »Countdown to Mass Ex­tinction?« cun le paleontologh Herwig Prinoth, dales 16:00 por todësch y dales 17:00 por talian. Dales 18:00 ales 20:00 pón spo se gode n bun aperitif cun la musiga de »!nes y Sofia« – Ines Tavella y Sofia Moling: döes musizistes jones, che cun usc tleres y n sëns fin por le sonn y por les emoziuns, porta dant sciöche solistes y te duet sües composiziuns y covers selezionades.
Por la vijita menada periunse do na pre­notaziun ala mail prenotaziuns@museumladin.it o al numer 0474 524 020. La vijita menada costa 10,00€, l’entrada al aperitif cun musiga é debann.

Festa dl jol cun mudiei
La Lia di Mudelisć »Curnacins« mët a jì, deberieda cun i Destudafuech de Albions, la festa dl jol cun mudiei n dumënia ai 24 de agost a Albions
Chëst ann vëniel inò metù a jì la festa per duc i apasciunei dl jol cun mudiei, ulache l fej for pea true­­pa grupes da tlo y da oradecà. I De­studafuech de Albions se cruzia dla pert gastronomica. Da udëi saràl d’uni sort de fliegri y joleri fac cun gran amor y lezitënza. Dut l di saràl ejibizions di piloc mudelisć, che mostra si savëi tl jol y l ne mancerà nia la animazion per mutons:ans.
Sëuraprò uniràl metù a jì n bel juech ulache duc ie nviei a fé pea: chël che unirà trat ite jirà defin ala lia Peter Pan.
Sce l tëmp ne lascia nia fé, vën la festa spënta de n’ena ai 31 de agost.

N istà anter conties, lumes e preziousc
Katiuscia e Carlotta de Aurona Ores te envia a te fèr ite te n mond maraveous e creèr tie simbol prezious. No perder l’ocajion dai 29 de aost
Ence chest an tel spazie artistich ‘Kreides Atelier’, te Strèda Rezia 44 a Vich, Katiuscia Rasom e Carlotta Nemela envia duc a cognoscer la lejendes ladines e l encant di simboi antiches de noscia cultura, realisé con la creides na­turèles di bosć fascegn.
De messèl e aost l é stat endrezà i aperitives de ‘Aurona Ores Jewels 2025’, per cognoscer la doi creatores di preziousc e sia opera, ma ence la beleza de noscia val e vèlch de sia conties e cultura. Anché, vender ai 22 de aost da les 17:30 al Kreides Atelier l é l ultim ape­ritif, debant e avert a duc.
L percors del istà se serarà su dapò en vender che vegn, ai 29 de aost con n event dassen spezièl: semper tel Kreides Atelier de Vich da les 20:30 (per zirca 2 ores) dutes e duc chi che tol pèrt podarà se trèr ite tel mond magich de la conties ladines e dapò fèr l’esperienza unica de creèr sie simbol prezious personèl, col didament de Katiuscia e Carlotta, esploran materièi, tecniches e creatività.
Per tor pèrt ge vel se scriver ite per Whats­App al numer 347 8929513 o per mail a info@auronaores.it. L cost l é de 15,00 euro e l tol ite i materièi duré. Ve speton!