La Usc di Ladins

En sabeda ai 6 de dezëmber él gnü tigní a Al Plan la festa de San Micurá, che é rové alerch pro le marcé d’Advënt a ti porté ai mëndri n scarnüz cöce cun de vigni sort de bun da sgolosé laite. Chësc sant é bëgn un de chi che vëgn plü che d’atri metü en relaziun cun l’umanité, la solidarieté y la generosité. Por ti dé espresciun a chisc valurs zënza tëmp, á en chësc iade contribuí ince i crejimanc d’Al Plan deboriada cun la Cooperativa Turistica. I jonins che s’arjigna da jí a confermé é stá döta la sëra a vëne de popcorn y bachëc de zücher firé, che costâ n euro porom. Döt ci che gnô ite jô por n bun fin, olache la Cooperativa Turistica s’á impegné da radoplé la soma. Insciö él garaté na spënora de passa 500 euro, che i gnará surandada al Südtiroler Kinderdorf. Soma che i crejimanc instësc jará a surandé de jená, por odëi davijin chësta strotöra y sciöche conclujiun de na aziun concreta söl tru de süa confermaziun.  (pablo)