La Usc di Ladins

Rocks&Art al Museo geologich
Scienza e èrt a confront tel Museo de la Dolomites de Pardac: se pea via en mercol ai 15 de messèl
Taca al Museo Geologich de la Dolomites te Piaz SS. Felip e Giacum a Pardac na lingia de cater scontrèdes, semper da les 17:00: n dialogh percacent anter scienza e èrt sot al titol Rocks&Art.
Ai 15 de messèl te ‘Waterbodies’ (corpes de èga) l artist multimedièl Salomè Bazin conta sie lurier anter area digitala, esperienza e performance tel confront con Judith Inglavaga che rencura per l MUSE l projet S+T+Arts Acqua Motion.
L’autra scontrèdes: ai 22 de messèl ‘Mar­molada. Il respiro della Regina’ col soud artist Sergio Maggioni e Carlo Maiolini del MUSE; al 29 de messèl ‘Le prime fotografie delle Dolomiti’ con Lorenzo Dezulian e Davide Baldrati che prejenta i retrac de Franz Dantone Pascalin; ai 5 de aost ‘Il paessaggio sonoro’: Maria Bertolini del MUSE a confront con Sebastiano Beozzo del Con­servatorie de Trent. La scontrèdes é debant, per tor pèrt ge vel se prenotèr su www.visitfiemme.it o al numer 0462 500366


Al é indô ora de Gadersound!
Ai 17 y 18

• 
•  

View the embedded image gallery online at:
https://www.lausc.it/manifestazions-y-evenc/32156-manifestazions-atuales-speziales#sigProIdab4c006c5c

de messé vëgnel indô balé ti Plansc dl Galber a Pidrô
Bele por le 21ejim iade vëgnel tigní le »Gader­sound Open Air Festival« a Pidrô. Le festival vëgn daurí en vëndres ai 17 de messé dales 20:00 cun »De Strangers«, denanche »Le Eine« y »Giufá« fejes balé döt Pidrô.
Por mëte man bun la sabeda, vëgnel dan­misdé organisé n curs de yoga, da misdé sarál spo n program de intratignimënt por families. L’entrada é la sabeda da misdé ince chësc ann debann. Le program musical jará spo inant cun dui artisć locai, la »Cooperaziun Planta« y Julian Moling. 
Dedô sarál »Sound of Sun« y »Disperato Circo Musicale« che scialda ite le publich por un di grups plü co­nesciüs a livel nazional; i »España Circo Este«. Stlüt jö vëgn le festival dal grup »Rebel Rootz« da Trënt. I organisadus dla uniun Adüm EO se la conforta da ti dé le bëgnodü a tröpa jënt y inviëia düc da se tó para la bona löna y tröpa energia.


La Bira Te Fascia
L Festival de la bira artejanèla da mont sarà endodanef a Ciampedel jun Ischia dai 17 ai 19 de messèl
L é ruà a la XIV edizion l Festival de la bira ar­tejanèla da mont, che la Sociazion Co­mu­nicarea à pissà e volù per valorisèr i picoi pro­dutores che auza fora ence cultura, tradizion e identità. Chest an ve speton endodanef a Ciam­­pedel, dai 17 ai 19 de messèl. Sot l tendon de Ischia, en vender e sabeda da les 17:00 a les 24:00 e en domenia da les 12:00 a les 24:00, podede cercèr dejines de bires arte­janèles de produtores del Trentin e de autra regions de la Tèlia, cernui per contèr travers la bira ence l’ènema de sia ‘teres autes’. L rich program sporc degusta­zions, ga­stronomia a km0, musega folk e rock, master­class con abinament anter bira e pro­duzions de ezelenza, laboratories per bec dai 3 ai 12 egn con noscia educatores e l con­cors populèr ‘Na bira per l istà’ olache duc do aer cercià la bires i pel cerner coluna che ge sà miora.
Program:
En vender ai 17:
da les 17:30 »MaltAttak«: laboratorie (5-12 egn) anter malt de òrc, levà e bièves, su prenotazion
da les 21:30 musega folk rock coi Drunken Willow
En sabeda ai 18:
da les 17:00 »MaltAttak« e Masterclass »Bira e saores da mont« coi Beer Taster de Unionbirrai, su prenotazion
da les 21:30 super conzert con The Rumpled
En domenia ai 19
da les 12:00 aur i stonc de bira e magnadiva
da les 15:00 »MaltAttak«
Da les 16:30 Masterclass e laboratorie arti­stich-naratif »Tutti i frutti« (3-6 egn)
Da les 18:00 musega live  pop rock coi Fade
Da les 21:00 Finèla di Mondièi en direta e dapò festa e legreza fin mesanet.
Co la colaborazion de Uni­on Birrai, ApT de Fascia e Cedea e l sostegn de Provinzia de Trent, Comun Ge­­­neral de Fascia e FPB Cassa.
Info www.labiratefascia.it; Whatsapp 329 9159877; 
Prenotazion per laboratories e masterclass: labiratefascia@gmail.com.


Theatrum Naturae – La paladina dl’ejistënza
Tla galaria Vijion a Puntives vëniel giaurì ncuei vënderdi ai 10 de lugio dala 18:00 na mostra dedicheda ala natura
La mostra Theatrum Naturae uel auzé ora la pitla y gran marueies dla natura che se lascion suvënz mucé y ne abadon nia. Si belëza ncanta for inò y nvieia a se fermé y cuntemplé. Bele da for à la natura ispirà duta la formes d’ert. Tl’ert cuntemporana ne vën la natura nia mé reprejenteda do si estetica, ma l vën auzà ora strutures, muvimënc coche simbuli de vita. La mostra Theatrum Naturae ulëssa strënjer l liam danter natura y cultura y sotrissé l raport delicat danter duta l’ejistënza.
I artisć che mët ora: Karolina Gacke, Hanna Battisti, Hons Finezza, Julia Bornefeld, Kristina Weiss y Egon Digon.
Orar: 11.07. – 10.08.2026, lunesc nchin sada dala 16:00–19:00, o cherdan su l 338 2098697.


»Gipfelstürmer« musicai
Le grup Harmonic Brass Ensemble deura la ediziun nöia dl Festival Badiamusica, ai 15 de messé sön paiun d’Al Plan
Le Festival Badiamusica á despassé le chert de secul y inviëia ai 15 de messé da­­les 21:00 a so pröm conzert dl isté, sön paiun d’Al Plan de Mareo. Da aldí él le »Harmonic Brass Ensemble«, metü adöm da Hans Zellner y Elisabeth Fessler ala trombëta, Andreas Binder al corn, Alexander Steixner al trombone y Karl – Wilhelm Hultsch ala tuba. Sot al titul »Gipfelstürmer« gnarál porté dant n pro­gram de musiga afascinanta che vëgn da regiuns da munt de döt le monn. Y sciöche le tëmp se müda te n sarëgn sö alalt, insciö se müda ince les coordinades mu­sicales dl grup: incherscimun, prigo, li­grëza, pié ia y tó comié. La opera prin­zipala te n aranjamënt sensazional sará la »Alpensinfonie« de Richard Strauss.


Perzeziuns dla natöra
Le »Cuartet mescedà« de Gherdëna sona en jöbia ai 16 de messé dales 17:00, danter i mürs storics dl Ciastel de Tor a San Martin
»Cuartet mescedà« se tlama le grup metü adöm da Katharina Lardschneider, Maria Senoner, Alex Designori y Filip Senoner, che sona en gaujiun dl Festival Badiamusica, en jöbia ai 16 de messé dales 17:00, tl Ciastel de Tor a San Martin. Cun le program »perceptions of nature«, inviëiai da esploré le spirit sonur ampl de chësta formaziun particolara metüda adöm da corn, saxofon, fabló y tuba. 
Datrai fin y calm sciöche na brisa lisiera, datrai ví y sterch sciöche n ozean furius. Mo la musiga ne pó nia ma rapresenté la natöra: al é na imitaziun cheriada artifizialmënter, n tentatif da ti dé forma a ci che la natöra é: nia da controlé o da preodëi.


Musiga de Beethoven, Pärt y Brahms
Le Festival Badiamusica pîta en lönesc ai 20 de messé n conzert dl duo »Repetto & Pernthaler«, cun n repertore por cello y clavier
I dui musizisć jogn Jana Pernthaler y Raphael Repetto sona deboriada da plü co 10 agn incá. En lönesc ai 20 de messé dales 21:00 ési da aldí tl salf dles manifestaziuns a Corvara, por le conzert »Spiegel im Spiegel«. 
Tratan chësta serada dedicada a n repertore por cello y clavier, fej i dui musizisć n iade mu­sical fora por epoches stilistiches desvalies y ai presentará n valgügn capolaurs dla leteratöra dla musiga da ciamena. 
Le toch zentral dl program sará la »Sonata op. 102 n. 1« de Ludwig van Beethoven. I dui musizisć é bele gnüs premiá tl cheder de deplü concursc nazionai y internazionai.


Nos dales bales
Fora por le zënter da San Linert pón ciarcé de vigni sort de bales, da sarades a duces, en mertesc ai 14 de messé
Sciöche le titul dla manifestaziun dij, é les bales les protagonistes dla manifestaziun che vëgn tignida fora por le zënter de San Linert a Badia ai 14 de messé dales 19:00 inant. 
Nü coghi y conditurs de deplü hotí y restoranc de Badia interpretëia do süa fantasia y so stil chësta spezialité locala. Les variaziuns de bales duces y sarades gnará sorvides adöm a n bun gote de vin de Südtirol. 
Döt chësc fora por la strada prinzipala da San Linert, che vëgn por l’ocajiun stlüta al trafich dales 18:00 ales 23:00. Le grup »Jam’son« pîta l’intrati­gnimënt musical. Por tó pert ala serada »Nos dales bales« n’ól ester degöna prenotaziun y an pó cumpré i bons por les bales bele danfora, ti ofizi turistics dl’Alta Ba­dia o diretamënter en chë sëra tl zënter da San Linert. Sce al foss bur’ tëmp, vëgn la ma­nifestaziun spostada ai 16 de messé.


Curs por realisé na »scoltöra verticala«
L’EPL-Ert por i Ladins inviëia a n curs tl Studio Zona a Pedraces cun la referënta Gaia Lionello por fá na scoltöra verticala y la depënje
Le curs vëgn tigní en mercui ai 22 de messé dales 14:30 ales 18:30 y é resservé a mitans y mituns dai 8 ai 13 agn, che pó gní acompagná da n adult. 
Le cost é de 45,00 euro plü 20,00 euro de material. Les iscriziuns vëgn tutes sö al numer de telefon 333 3653636 (Gaia). Le numer de partezipanc é limité a indöt ot.