La Usc di Ladins

Generala dla Lia da Munt Ladinia
En vëndres ai 20 de novëmber dales 19:30, tl salf dles manifesatziuns da San Martin de Tor
La Lia da Munt Ladinia – Val Badia tëgn süa incuntada generala, en vëndres ai 20.11. dales 19:30, tl salf dles manifesatziuns da San Martin. Le program mët man cun le salüt dl presidënt, por passé spo ala relaziun sön l’ativité desfirada tl 2026. Ara vá inant cun le bilanz provisore AVS y CAI y spo sarál na presentaziun dl Aiüt Alpin y consëis. 
La serada vá a piz cun na cëna y aurela cörta deboriada.

Marcé dl patüc fat a man
Creativité, savëi y fantasia é trëi parores che an pó adoré por definí en cört le »Marcé dl patüc fat a man«, che gnará a s’al dé ai 22 de novëmber a Corvara
La Uniun dles Ëres da Corvara mët a jí en domënia ai 22 de no­vëmber dales 10:00 ales 17:00 le »Marcé dl pa­tüc fat a man«, tl salf dles manifestaziuns da Cor­vara. Al gnará metü fora patüc fat a man da pert de apresciapüch 25 esposituries y esposidus.
Na pert de ci che vëgn trat ite i jará a na familia dla Val Badia che á debojëgn.

Pea via la rassegna de teater ladin!
I Servijes linguistics e culturèi del Comun General de Fascia ve envia a teater. Sun paladina 4 gropes
Zacan podon endò se sciudèr ite la mans e passèr n bel moment gustegol e de spas a tea­ter. L temp va coran, l é jà passà doi egn da l’ultima rassegna, e i Servijes linguistics e cul­turèi del Comun General de Fascia, co la gran gaissa e l lurier di atores di gropes de teater de la val, met a jir la quarta edizion de la rassegna de teater ladin.
Da junsom fin tinsom la val, dai 26 de no­vember enscin a en mèrtesc de Carnascèr, se podarà se goder co l’èrt da paladina. 
La rassegna la ge vegn dedichèda ence chesta outa a Vigilio Iori, che l é se n jit de dezember del 2022, galantom che scialdi se à dat ju per l bel teater, la scola e per l lengaz ladin. Aer a cher l teater l é desmostrèr amor per la cultura e per l lengaz. L teater l é stèr adum, tor ca situazions da vigni dì, ma ence temp e dedizion. No l é sorì e sobito fat e donca n bel develpai dantdaldut a duc i atores che se tol l temp e se dèsc ju per ge fèr passèr n mo­ment lijier a la jent, ma ence a chi che ge stèsc do a scenografies, belet, petenadura, pèrts e regia.
Desche semper vegnarà dat fora la tessera olache, per ogne grop e per ogne comedia, vegnarà metù su n stempel. Con trei, se ciaparà n don ladin deldut particolèr. Tolevela do! Donca, ve speton duc a teater! Godeve e segnave su sul calandèr duc chisc apuntamenc.
Program:
»La Mizacoles de Ciampedel« co la comedia ‘L é dut n craut’
En jebia ai 26 de november – da les 20:30 te teater de Moena
En sabeda ai 28 de november – da les 20:30 te chino de Cianacei
En domenia ai 29 de november – da les 15:00 te chino de Cianacei

»I Bontemponi« co la comedia ‘L aereo più svergol del mondo’
En mèrtesc 1° de dezember – da les 20:30 te teater de Poza
En jebia ai 3 de dezember – da les 20:30 a La Gran Ciasa de Soraga
En domenia ai 6 de dezember – da les 15:00 de tendon de Poza

»Antermoia« co la comedia ‘L inventor del ciaval’
En vender ai 11 de dezember – da les 20:30 te PalaDolomites de Ciampestrin
En domenia ai 13 de dezember – da les 15:00 te chino de Cianacei

»L Grop de La Mèscres de Dèlba e Penia« con sia mascherèdes ‘Fascia, paussa in pèsc’  scrita da Nicoletta Riz e ‘La mort sul zirm’ de Simon de Giulio. 
Duc i apuntaments é da les 20:30 te la veia scoles de Penìa:
En mercol ai 20 de jené
En sabeda ai 30 de jené
En jebia ai 4 de firé
En mèrtesc ai 9 de firé

Teater a Santa Cristina
Chëst ann à la grupa Teater de S.Cristina inò mparà ite n blòt pez da rì. L se trata dla cumedia te 3 chedri »La Bonne Adresse« de Marc Camoletti, repurtà tl gherdëina da Bruno Senoner cun l titul »Sons’a tlo drët?«. Regia de Isolde Senoner
Tl cuatier de Madame Babette viv ora dla fancela Anna nce doi fitadines, la molera Lisa y la pianista Beate. 
Duta cater dà su n nserat cun la speranza de ruvé pro chël che les ëssa gën. Sun chisc nserac vën dò cà cater ëi, ma... ce sotsëura che l sauta ora, nianca da dì no!
La première sarà n merdi ai 24 de nuvëmber dala 20:30 tl self de Chemun a S. Cristina. 
Daldò saràl mo cin’ reprejentazions, for tl self de Chemun: n vënderdi ai 27.11. dala 20:30, n dumënia ai 29.11. dala 17:00, n lunesc ai 30.11. dala 20:30, n juebia ai 03.12. dala 20:30 y n vënderdi ai 4.12. dala 20:30.
Atëures
Babette De Lagó (madame)    Annemarie Schenk
Anna(fancela)    Laura Piazza
Lisa (molera)    Verena Prucker
Beate (sona l tlavir)    Cristina Stuffer
Spartakus (model)    Samuel Perathoner
Toni (chier n cuatier)    Kevin Schieder
Rudi (chier da maridé)    Samuel Runggaldier
Ivo Damulin (chier ëures de tlavir)   Andrea Caterisano
Che dij ite: Silvia Senoner.

Chertes danora pòssen apusté cherdan su Paola Stuffer al numer: 339 3399266. 
Sun Vosc unì se ncunforta la grupa de Teater S. Cristina.

Santa Zezilia cun la Müjiga de Badia
La Müjiga de Badia inviëia a na sëra plëna de emoziuns y melodies, en sabeda ai 21 de novëmber dales 20:30, tla dlijia de Badia
La Müjiga de Badia á le plajëi da ves invié a so conzert de Santa Zezilia sot al titul »Cantus et Symphonia«. Sot ala direziun de Matthias Thaler podará le publich aldí n repertore desvalí, cun musiga classi­ca, operes liriches y composiziuns plü modernes. N momënt particolar dla sëra sará dediché ala usc dla sopranista Stefanie Steger, che acompagnará la Müjiga te n valgönes dles plü beles melodies dla musiga classica, sciöche »O mio babbino caro« de Giacomo Puccini, »Königin der Nacht« de Wolfgang Amadeus Mozart o »Pie Jesu« de Andrew Lloyd Webber adöm a Clara Irsara ala vidora. Düc i mëmbri dla Müjiga de Badia Ves inviëia cun gran ligrëza a passé na sëra speziala, olache an podará se lascé trasporté dala belëza dla musiga y dales emoziuns ch’ara sá da scinché.

Conzert de Santa Zezilia
Le conzert anual dla Müjiga da La Ila vëgn iniann metü a jí la sabeda ai 14 de novëmber dales 20:00 tl salf dles manifestaziuns tla Ciasa de Cultura a La Ila
Al gnará porté dant toc fora de n repertore de varieté. Le conzert gnará daurí dal grup di musicontri jogn dl paisc »Mini Beat Band«, metü adöm aposta por l’ocajiun. Le grup sonará ciamó deboriada cun la Müjiga da La Ila denanche i lascé le palch por le program dla serada. Sot ala bachëta dl dirighënt Konrad Tavella y de Armin Valentini, gnarál soné toc de componisć desfarënc conesciüs y che é jüs tla storia dla musiga, sciöche toc plü moderns. La Müjiga da La Ila cun so dirighënt Konrad Tavella y le presidënt David Bernardi, inviëia de cör düc da gní a d’ascuté sö le conzert de Santa Zezilia.

Cunzert de Santa Zezilia dla Mujiga de Sëlva
La Mujiga de Sëlva nvieia al cunzert de Santa Zezilia, n dumënia ai 15 de nuvëmber dala 17:00 tla palestra de Sëlva
Cun meludies de cumposidëures coche Georges Bizet, Julius Fucik o Hans Zimmer uel la Mujiga de Sëlva mené l publich tres na bela sëira de mujiga y plëina de energia. Sot ala bachëta de Alexander Perathoner saràl da audì pec coche »Einzug der Gladiatoren«,»The Saint and the City« ma nce vel’ pez per un o plu solisć. Duc ie de cuer nviei a unì a scuté su y se lascé purté dala meludies mparedes ite ti ultimi mënsc.

Musiga cun tesć de San Francësch
Badiamusica inviëia indoman sabeda ai 14 de novëmber dales 17:00 te dlijia de Badia, por n conzert cun le »Vocalensemble AllaBreve«, en gaujiun di 800 agn dala mort de San Francësch de Assisi
Dl 2026 recordunse i 800 agn dala mort de San Francësch de Assisi. Por chësta ocajiun á le »Vocalensemble AllaBreve« metü en pé n proiet conzer­tistich aposta, che gnará ince porté dant ai 14 de novëmber dales 17:00, te dlijia de Badia. Söl program él operes a-cap­pella cun tesć de San Fran­cësch te deplü lingac, sciöche p. ej. le »Sonnengesang« de Petr Eben, le »Laudate Domi­num« de Giovanni Pierluigi da Palestrina«, le »Laudato si« de Franz Herzog y d’atri.

Markus Vallazza – »A Urtijëi, 1955–1975«
Tl self dla mostres tla Cësa di Cungresc a Urtijëi uniràl metù ora na mostra de Markus Vallazza
L Chemun de Urtijëi, deberieda cun l Istitut Ladin Micurá de Rü y l Museum Ladin dedicheia na gran mostra persunela al dessëniadëur y graficher Markus Vallazza, n ucajion de si 90 ani. L sarà da udëi plu de 40 opres sun tëila y papier, coche nce nzijions y cudejiei cun schizes y fotografies de si ani te Gherdëina, danter l 1955 y l 1975.
La giaurida sarà ai 18 de nuvëmber dala 18:00. La mostra sarà da udëi nchin ai 29 de nuvëmber dal merdi nchin al vënderdi dala 16:00–19:00 y de sada y dumënia nce danmesdì, dala 10:00–12:00. De lunesc iel stlut. La finissage sarà ai 29.11. dala 11:00.

Al Plan: fotografies da zacan
Indoman sabeda ai 14 de novëmber dales 18:00 vëgnel daurí a Al Plan na mostra de fotografies da zacan dl paisc
L’Istitut Ladin »Micurá de Rü« y le Consëi de for­maziun d’Al Plan in­viëia ala daurida dla mostra de fotografies da zacan dl paisc d’Al Plan, en sabeda ai 14 de no­vëmber dales 18:00, tl salf dla Cassa Raiffeisen d’Al Plan. La mostra é spo daverta cina ai 22 de novëmber, vigni de dales 10:00 ales 12:00 y dales 15:00 ales 18:00. Forsc él zacai che pó ince porté pro da ciafé fora val’ inoms dles porsones söi retrac.

Ziclus dl mëis y bëgnsté feminil
Chësta sëra ó trasmëte na vijiun olistica dl ziclus dla mestruaziun, en vëndres ai 20 de novëmber dales 19:30, te scora mesana da La Ila
Na conescënza sota dl ester ziclich é na oportunité por vire te na manira plü cosciënta y en sintonia cun süa natöra feminina. I odarun co che n ziclus armonich se presentëia, co y ciodí che le ziclus pó influenzé nostes emoziuns y ci che i podun fá por favorí süa sanité. L’incuntada é da­verta a jones, ëres y a dötes les porsones interessades da aprofondí le bëgnester femi­nin. I ëi é bëgnodüs. Referënta é Gaia Mureda.

L or dl’eves
La Lia dal’eves Gherdëina mët a jì n curs per fé cëiresc, ai 21 de nuvëmber dala 15:00 nchin la 18:00 tla pitla sala de cultura tla Cësa di Cungresc a Urtijëi
L or d’l eves ne n’ie nia mé la miel, ma dantaldut nce la cëira. Duc i nteressei ie nviei de cuer a chësc curs, ntan chël che l unirà mustrà de plu techniches per fé cëiresc y d’autra cosses cun cëira, co dleghé ite cëires tla formes, co i mudelé cun plates de cëira o co fé berdons lascei ite tla cëira, y nscila inant. Refe­rënta: Maria Mayr Lago. L material unirà metù a despusizion dala lia, da paië ite ne n’iel nia, ma l vën prià bel de se lascé nuté su pra Evi von Exeli al numer 348/0638945 ajache l numer di partezipanc ie limità.

De dla porta daverta a La Ila
Poscibilité da se informé söles scores altes y la manira da lauré
Les Scores Altes La Ila inviëia al De dla porta daverta, en vëndres ai 20 de novëmber, dales 8:00 ales 12:45 te süa sënta, a La Ila. Al vëgn presenté les trëi tipologies de scora alta che fej pert dl Zënter scolastich: Istitut Tecnich Economich, Lizeum Lingui­stich y Lizeum dles Sciënzes Umanes (SOWI). La direturia Monika Seno­ner, i insegnanc y les insegnantes, i stüdenc y les stüdentes ti dará le bëgngnü a geniturs, scolars y scolares y düc y dütes i interessá da conësce damí la strotöra de nostes scores, cun sües carateristiches y sües stru­mentaziuns tecnologiches, y por se fá n’idea de sciöche al vëgn lauré. Al gnará presenté valgünes novités importantes portades ite cösc ann de scora 2026/2027.

Mësses ciantades a La Ila y La Val
I Cors de dlijia da La Ila y La Val cianta deboriada, ai 22 y ai 28 de novëmber
Chëstes é les edemes olache deplü cors recorda Santa Zezilia, patrona dla musiga de dlijia. 
En chësc ann s’á i Cors de dlijia da La Ila y La Val metü adöm, por cianté deboriada döes mësses. Plü avisa gnarál porté dant la Missa Brevis in Es de Tobias Psaier. I cors ves aspeta en domënia ai 22 de no­­vëmber dales 8:15, pro la san­ta mëssa a La Val, sciöche in­ce en sabeda ai 28 de novëm­ber dales 18:00, pro la mëssa te dlijia da La Ila.

Superé la plüra do la mort de n familiar
Ai 20 de novëmber dales 15:00 él tl Raiun Sozio–sanitar a Picolin n referat cun le dot. Anton Huber
La Portina por l’assi­stënza y cura mët a jí n referat por todësch cun le psicologh dot. Anton Huber sura »Trauerbe­wältigung und Trauer­arbeit für Angehörige«, olache an proa da re­spogne ala domanda: Ci me dëida pa superé la plüra y le dolur do la mort ne n familiar? Le referat vëgn tigní en vën­dres ai 20 de no­vëmber dales 15:00, tla sënta dl Raiun Sozio-sanitar a Picolin.