Manifestazions atuales speziales

Data

20 de november 2026

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Publichedes ai 20 de november 2026
Marcià da Nadel dla Schiera Junila de Urtijëi
Coche uni ann, meterà la Schiera Junila de Urtijëi nce chëst ann a jì l marcià da Nadel, n dumënia ai 29 de nuvëmber
Ntan l’ultima enes se à i mutons y la mutans ma nce i acumpa­niadëures dla Schiera Junila dassënn purvà a pastelné decu­razions da Nadel y gherlandes d’Avënt per l’enes che vën y nvieia de cuer a passé n dumënia ai 29 de nuvëmber dala 7:30 nchin la 11:30 te Calonia de Urtijëi a cialé mpue y sambën gën nce a cumpré velch.
L sarà nce velch da pesslé y da bever. La Schiera Junila de Urtijëi se ncunforta sun vo!

ITF Women’s Val Gardena Südtirol
Da n dumënia ai 22 de nuvëmber inant saràl tl zënter dal tennis a Runcadic l turnoi dl’ëiles ITF Women Val Gardena Südtirol Raiffeisen
L turnoi ITF dl’ëiles cun n montdepest de 40.000 $ jirà inant nchin a n sada, 28 de nuvëmber y pieta inò n niveau scialdi aut a livel mundiel. L unirà jugà dut l di y dala 18:00 inant saràl for na partida da sëira.
N vënderdi ai 27 de nuvëmber saràl dala 11:00 inant la doi semifineles dl singul y la finela dl dopl.
N sada ai 28 de nuvëmber dala 10:00 saràl la finela dl singul.
Cun plajëi nvieia l Tennis Club Urtijëi duc y dutes a unì a ti cialé ala partides. La ntredes ie debant y l sarà nce n blòt quiz cun de biei pesć da vëncer.

L’ert de Gherdëina tl cumbater la mafia
L Circolo – Lia Mostra d’Ert nvieia ala pruiezion dl film, n juebia ai 26 de nuvëmber dala 20:00 tl self dla mostres dl Circolo – Lia Mostra d’Ert a Urtijëi
L film de Stefan Winkler dal titul »L’arte della Val Gardena nella lotta alla mafia« ie per tudësch y talian (zënza sottituli).
Sun nvit dla »Fondazion Falcone« à n valgun artisć de Gherdëina metù ora si lëures tla Sicilia per purté n messaje per cumbater deberieda la mafia. Gregor Prugger à pruvocà cun si opra ‘Der Allesbaum’. Gerald Moroder à metù ora si scultura ‘Aus dem Kampf Auferstandene’. 
Peter Demetz à ntujiasmà l publich cun si opra ‘Der Triumph der Erinnerung’. Fabrizio ‘Biz’ Senoner à tapezà la zità de Palermo cun si azion ‘Opzion 2’. N ucajion di 30 ani dal atentat de Capaci, ulache l à perdù la vita l giudesc y anticomunist Giovanni Falcone, si fëna Francesca Morvillo y la verdies dl corp Vito Schifani, Rocco Dicillo y Antonio Monti­naro, à nce l ciantautëur y reghisser de Bulsan Stefan Winkler judà pea pra la cumemorazions a Palermo y à tëut su chësc film.
Do la pruiezion dl film saràl nce na mëisa turonda ulache l fajerà pea i artisć y l ambolt de Urtijëi Tobia Moroder.
La ntreda ie debant.

Second Hand Event
L Circolo – Lia Mostra d’Ert mët a jì chësta fin dl’ena, ai 21 y 22 de nuvëmber, na manifestazion ulache n po’ cumpré roba de segonda man
N sada ai 21 y n dumënia ai 22 de nuvëmber gëura l Circolo si portes dl self dla mostres a Urtijëi per l »Second Hand Event«.
L orar de giaurida ntan chisc doi dis ie dala 9:00 nchin la 17:00. Duc ie nviei de cuer a passé y cumpré velch de segonda man.

Taca ite la rassegna de teater ladin
L prum grop a verjer la coltrines l é La Mizacoles: ai 26 te Oratorie de Moena, ai 28 e 29 te chino Marmolèda de Cianacei
Taca ite la rassegna de teater ladin endrezèda dai Servijes linguistics e culturèi del Comun General de Fascia. L é la edizion nr cater e ence chest’outa la ge vegn dedichèda a Vigi­lio Iori, se n jit de dezember del 2022, che l se à semper dat ju n muie per l teater ladin e chesta l é na vida spezièla per l recordèr. 
L prum grop a verjer la coltrines l é La Mizacoles de Ciampedel che met dant »L é dut n craut«, na comedia da grignèr te doi ac de Giuseppe Della Misericordia e la regia de Loreta Florian. I apuntamenc i é en jebia ai 26 de november da les 20:30 te teater del Ora­­torie de Moena, en sabeda ai 28 da les 20:30 te chino Marmolèda de Cianacei e en dome­nia ai 29 da les 3 domesdì semper te chi­no Marmolèda de Cianacei.
Desche semper l staff di Servijes linguistics e culturèi darà fora la tessera olache, per ogne grop e per ogne comedia, vegnarà metù su n stempel. Con trei, se ciaparà n don ladin del­­­dut particolèr. Tolevela do! La Mizacoles ve speta a teater!

Marcé dl patüc fat a man
Creativité, savëi y fantasia é trëi parores che an pó adoré por definí en cört le »Marcé dl patüc fat a man«, che gnará a s’al dé ai 22 de novëmber a Corvara
La Uniun dles Ëres da Cor­vara mët a jí en domënia ai 22 de no­vëmber dales 10:00 ales 17:00 le »Marcé dl pa­tüc fat a man«, tl salf dles manife­staziuns da Cor­vara. 
Al gnará metü fora patüc fat a man da pert de apresciapüch 25 esposituries y esposidus.
Na pert de ci che vëgn trat ite i jará a na familia dla Val Badia che á debojëgn.

Bozen Brass
Ai 27 de nuvëmber saràl doi cunzerc dl Bozen Brass tla Cësa di Cungresc a Urtijëi: dala 17:00 n cunzert per families y un dala 20:00
I sies musizisć che vën dai crëps de Südtirol sà da ncanté cun na gran legrëza tl suné, n gran savëi y n spectrum de mujiga che va dal baroch al pop, dal tlassich al jazz, dal folk ala chanson: n viac da stramp bel tres duc i stii.  La cumbinazion danter serenità tiroleja, temperamënt talian y truepa esperienza madurida sunan te orchestres nternaziuneles rënd dut puscibl, l amor per la mujiga se tira sciche n fil cueciun tres la storia dl Bozen Brass. La chertes de ntreda ie da giapé pra la cassa y danora tl ufize dla Lia per l Turism de Urtijëi: tel. 0471 777 600 – ortisei@val gardena.it.
Cunzert per Families
L medemo dì dala 17:00 tenierà l Bozen Brass nce n cunzert per families, for tla Cësa di Cungresc a Urtijëi. Tl teater de mujiga nteratif per mutons y mutans dai 6 ani insù uniràl cuntà la storia de Wolfine: n lëuf che nen à assé de si stlet inuem tla cunties tlas­siches…
La ntreda ie debant.

Cunzert de S. Zezilia dla Mujiga de Urtijëi
La Mujiga de Urtijëi nvieia al cunzert tradiziunel de Santa Zezilia, n dumënia ai 22 de nuvëmber dala 17:00 te Cësa di Cungresc a Urtijëi
Cun l cunzert de Santa Zezilia fina via l ann mujighel dla Mujiga de Urtijëi. Nce chëst ann à l dirighënt Egon Lardschneider metù adum n prugram drët nteressant.
La prima pert dl cunzert ie dedicheda a opres tlassiches. Sun l prugram iel danter l auter »Olimpica« de Giovanni Orsomando y »Finlandia« de Jean Sibelius. N highlight ie l »Concertino for Marimba and Winds« de Alfred Reed, pra chël che l sarà da audì Christian Perathoner coche solista sun la marimba. Ala fin dla prima pert dl cunzert saràl da audì la »Marcia de Boccaccio« de Franz von Suppé.
Tla segonda pert dla sëira vëniel prejentà mujiga moderna. Da audì saràl »Fantastica« de Martin Scharnagl, »Lake of the Moon« de Kevin Houben y »Virginia« de Jacob de Haan. Per finé via se à la musicontres y i musicontri cris ora »Rekruten Marsch« de Ernst Mosch. La Mujiga de Urtijëi se ncunforta sun Vosc unì y mbincia n bon scuté su.

»Voci controvento« – Ujes contra l vënt
L Tublà da Nives te Sëlva gëura si portes per n cunzert dl »B-Folk Quartet«, n sada ai 28 de nuvëmber dala 18:00
»Voci controvento« – Ujes contra l vënt – ie n viac mujighel-naratif tres l’ert dla ciantia d’autëur taliana, te chëla che l vën adum stories dl aspité, dla perduda, dla lidëza y dla ujinanza. L vënt ie l fil simbolich de n percurs, te chël che uni usc chier si lerch, danter resistënza y delicatëza. Tla narazion se baràtel ju ironia, reflescion y energia, zënza dé dant na storia singula y zënza permëter na renasciuda che dà na soluzion. La mujiga pieta n mumënt per scuté su, per lascé do i festidesc y per se recunëscer. Purempò ne porta nia uni streda al medem travert. Ala fin ne sarà nia dut stlarì. N scuterà su inant. Nce la ujes plu chietes. Nce chëles, che va contra l vënt.
L sunerà Francesco Basciu ala chitara, Alex Bosio al bas eletrich y Elisa Michelon al saxofonn. Domenico Laratta sarà la usc che cianta y conta. Ntreda: 10,00€ – Cumëmbri »Tublà da Nives«: 8,00€.

Gran Batadù di Destudafuech de Sëlva
I Destudafuech de Sëlva nvieia al Gran Batadù da 128, n dumënia ai 22 de nuvëmber tla sala di Destudafuech te Sëlva
Coche da tradizion mët i Destudafuech de Sëlva inò a jì n Gran Batadù n dumënia ai 22 de nuvëmber. Dala 10:00 inant puderàn »Frühschoppen« y daldò puderàn s’la lascé jì bona y sté n cumpanìa pra na bona marënda cun Törggelen. L turnoi de batadù scumëncia dala 14:00 y per mutons y mutans dai 5 ai 12 ani saràl n turnoi de »mau mau«. L sarà nce mujiga dal vif y devertimënt cun la grupa »Conturines Echo«, che sunerà dala 16:00 inant nchin la 21:00 y n puderà sambën vëncer de biei pesć, danter chisc n schipass per Gherdëina, n »day spa« y n bon per cumpré ite te na butëiga dal sport. 
Sëuraprò saràl mo truep de biei pesć da pudëi vëncer pra l cëst dala fertuna. Iscrizions vën tëutes su n chël di dala 10:00 inant tla sala di Destudafuech.

Marcé da Nadé t’La Spona
Tl zënter sozial La Spona a Pidrô vëgnel indô tigní le Marcé da Nadé, en sabeda ai 28 de novëmber, dales 9:00 ales 16:00
Al mët man bel plan da gní frëit, i dis che nes despartësc da Nadé vëgn tres demanco y l’atmosfera vëgn tres plü plajora. Porchël oress i assistis y i assistënc dl zënter sozial La Spona dër bel invié al Marcé da Nadé.
Ai ves aspeta en sabeda ai 28 de novëmber dales 9:00 ales 16:00. An ciafa creaziuns y decoraziuns fates a man dai assistis, idees por scincundes da Nadé, gherlandes d’Advënt, lëgns da Nadé tradizionai y moderns, angeli, scatores de lignan vedl y n gröm d’ater bel patüc. L’Uniun Ladins Val Badia sará ince ala pert cun n pice marcé di libri.

Mësses ciantades a La Ila y La Val
I Cors de dlijia da La Ila y La Val cianta deboriada, ai 22 y ai 28 de novëmber
Chëstes é les edemes olache deplü cors recorda Santa Zezilia, patrona dla musiga de dlijia. 
En chësc ann s’á i Cors de dlijia da La Ila y La Val metü adöm, por cianté de­boriada döes mësses. 
Plü avisa gnarál porté dant la Missa Brevis in Es de Tobias Psaier. I cors ves aspeta en domënia ai 22 de no­­vëmber dales 8:15, pro la san­ta mëssa a La Val, sciöche in­ce en sabeda ai 28 de novëm­ber dales 18:00, pro la mëssa te dlijia da La Ila.