La Usc di Ladins

Se à serà sù a Moena l tornoi de tennis ‘Cassa Rurala Dolomites’ che vegn metù a jir via per de aost da presciapech na trentina de egn, oramai na tradizion donca, resservà a jiadores de 3^ e 4^ categoria e nia classifiché, de valuta per l Gran Prix Trentino 2021.

A viventèr l cartelon l’é stat ben 91 scric ite, 72 omegn e 19 femenes, presciapech l 50% ghesć, n numer che l’é dò a crescer - l’à dit l responsabol de la strutura sportiva Stefano Chiocchetti – de gra ai suzesc di tenisć taliegn.

L temp meteo chest an à didà, per grazia percheche con doi ciampes demò a la leta defat no fossa sorì cogner recuperèr partides, soraldut ti ultimes dis e sabeda e domenia, canche se à jià la doi finèles de eles e ic, l’é stat de bela giornèdes de ciaut e soreie, per l content di sacotenc amisc e parenc rué a se goder i bie momenc de sport tel zenter sportif Navalge.

A se cruzièr de l’endrez, che ogne an vegn semper aprijià per efizienza e capazità, l Tennis Club Moena: »Meton a jir chest tornoi tel meis de aost apontin per ge dar la possibilità a n gran numer de turisć de tor part apede ai jiadores classics – l’à deschiarì Chiocchetti.

La sorpresa del tornoi l’é stat Gaia Donati, fia de la jiadora Monica Scartoni, che l’é na maestra de tennis e ex 409 al mond. Gaia, 11 egn, partida dò partida con grinta e determinazion la é stata bona de ruèr en semifinèla, olache la é stata batuda da la venjidora Fantina.

De più su La Usc stampèda de en vender ai 20 de aost del 2021.

 (Cristina Marchetti)