La Usc di Ladins

La fin dl’edema plü lungia de Santa Maria Imacolada n’á nia ma porté la pröma ona de sciori, mo á ince cherdé al apel i atlec dl cërtl "Marlene Cup", cun döes gares nazionales tla val de Schnals, varëntes ince por le Marlene Cup. Tl gigant di 7 de dezëmber i ésera jüda dër bun a Max Clara d’Al Plan, atlet dl Kronplatz Ski Team, che á fat le miú tëmp tla categoria U21 cun 2:02,44 menüc. Por mirit de na gran secunda manche, ál destaché de 83 centejims David Castlunger dl Ski Team Alta Badia, che é gnü secundo. Ince le terzo post de categoria é ladin, cun Alberto Davare dl ST Alta Badia, tardí de 1,75 secunc. Pro i U18 à indere davagné Jordan Stuefer dl Ski Team dla Munt de Suc, tratan che Giacomo Ploner dl ST Alta Badia á podü salté söl secundo scalin dl podest. Tla categoria feminila él da alzé fora le resultat de Lena Sottara dl ST Alta Badia, cun le terzo post tla categoria U18. Na gara êl ince bele N gigant êl ince bele sté le de denant, olache David Thaler dl ST Alta Badia á fat le miú tëmp cun 2:00,65.
Da alzé fora ince la gara FIS stada ai 3 de dezëmber, olache David Castlunger á arjunt le 2. post final y le pröm tla categoria U12, cun le tëmp de 1:47,95. Ai 4 de dezëmber á Max Clara arjunt le 2. plazamënt general, che orô dí le pröm ti U21. A Sulden á ince Arianna Putzer de Gherdëna fat resultat de gigant – n iade cun le 3. plazamënt general, che orô dí le pröm post tla U18, y n iade cun le 2. post U18 do l’atra süditroleja Victoria Klotz.  (pablo)