Fresch de stampa, en sabeda ai 4 de mé te oratorie de Poza l é stat prejentà l ultim liber de l’Union di Ladins de Fascia. N liber dassen bel e rich, de gran format cartonà, che tol ite ben 366 gregn retrac.
Chesta fotografies, chèrtes de posta che en gran pèrt vegn da la colezion de Fiorenzo Secchi ‘Floz’ da Ciampedel, moscia ciantons de duc i desvalives paijes de Fascia e per chest l liber se lea particolarmenter col tem de l’Aisciuda ladina de chest an, dedichèda apontin ai lesc de noscia tera e a si inomes.
Con emozion la joena Nicoletta Riz à prejentà sie gran lurier, l secondo do »Fascegn. Retrac de jent da zacan«, dat fora semper da l’Union di Ladins de Fascia dantan. Ence te chel cajo a fèr da protagonisć l era retrac da zacan, enlouta touc fora da la rubrica »Chi él pa?« che da passa 20 egn en ca vegn fora su La Usc di Ladins.
Chel di retrac da zacan l é n tem n muie atratif te chest temp, se l veit ence dai social e en sabeda passèda de tropes se à binà a la prejentazion de chesta neva publicazion.
N liber che pel fèr bela parbuda sul pult de ogne stua – à dit l president de l’Union Fernando Brunel – ma ence te la entrèda de ogne hotel, percheche duc, fascegn e ghesć, posse ge vardèr: chi più de età descuerjer recorc, i più joegn descorir segnes del passà e i tegnir vives, duc se fèr n pensier sun coche dut l é mudà e tant de nosc patrimonie che l é stat destrabonì.
De più su La Usc stampèda de en vender ai 10 de mé. (Lucia Gross)
N retrat e n proverbie vigni dì del an
L’Union di Ladins de Fascia à prejentà sie ultim liber: »Ciantons. Cartolines e proverbies da zacan« rencurà da Nicoletta Riz con chèrtes de posta de Fiorenzo Secchi ‘Floz’.
Galaria retrac
View the embedded image gallery online at:
https://www.lausc.it/valedes-ladines/fascia/27104-n-retrat-e-n-proverbie-vigni-di-del-an#sigProId5ff7ad6770
https://www.lausc.it/valedes-ladines/fascia/27104-n-retrat-e-n-proverbie-vigni-di-del-an#sigProId5ff7ad6770