La Usc di Ladins

En lunesc al prum de messal la comunanza de Soraga à compagnà te sie ultim viac su la tera Giorgio Zulian del Lilo, se n jit en sabeda ai 29 de jugn, en Sèn Piere e Sèn Paul. 

Giorgio l era n muie cognosciù e benvolù te paisc, stimà da duc per sie servije fat con umoltà e dedizion a la gejia desche monech. L à tacà jà dant del 1970 a didar col borset Carleto Rossi del Baila e bele prest do l à tacà a l didar semper de più. L à fat l monech presciapech fin del 2018, ence canche i prumes segnes de la malatia del Alzheimer se fajea sentir. Na malatia che é doventada semper più grieva e che no ge à più lascià rechia. Soa femena Beppina coi fies Marco e Cristina e si nevoes se l à semper rencurà te ciasa, ence se la crousc é stata a oute pesoca, i à semper tout dant i momenc senestres con tanta fe e rengrazià per i momenc bie che i podea viver ensema.

A la messa de sepoltura, ofiziada da don Andrea, à tout part ence Padre Giovanni del Baila, don Gilberto e don Celestino Riz. Don Andrea l à dit che l é emblematich che Giorgio l sie se n jit proprio l dì di Sènc Patrogn de Soraga e che segur Sèn Piere e Sèn Paul lo compagnarà te sie viac sun Paradis. 

De più su La Usc stampèda de en vender ai 5 de messèl.  (MCI)