La Usc di Ladins

La Pieif de Fascia, fornida su a gran festa, se à empienì te ogne piz e cianton en domenia ai 5 de otober per la messa grana de rengraziament e de salut a don Andrea Malfatti. Autorità zivile, museghe, cores, gropes de folclor, scizeres, alpins, Crousc Checena e n gran numer de jent à strent te n gran braciacol l piovan don Andrea che, con coi 26 de otober, ciapa te man le parochie de Borgo Sacco e San Giorgio vejin a Rorei.
La procescion con dantfora la crousc e i confalons de le 5 parochie de la Val de sot é pontada via dal Comun General de Fascia. La pruma tapa é stata tedant la Ciasa de Paussa, la 6^ parochia, descheche à dit don Andrea, e chiò l à benedì e preà per duta la jent che stasc te chesta strutura. Tedant Pieif l é stat fat su n gran arch de dasce con le doi scrite: »L Segnoredio te benedesce e te varde via« e da la man sotite »Detalpai don Andrea, bon viac«.
Duc chenc se à fat lèrga te gejia, le bandiere dinlongia utar, l cor de joegn e i servidores apedeju e i corisć de dute le parochie sui orghegn. Sun utar, apede don Andrea, l era don Erminio Vanzetta, don Devis Bamhakl e l diacon Antonio Ghetta.

Se pel lejer dut e veder desvalives retrac su La Usc nr 39 dai 10 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (Monica Cigolla)