La Usc di Ladins

L servije de posta l é semper più miser: oraries di ofizies smendré, pech personal e amò apede la posta che no vegn consegnèda. La situazion no é più da tegnir fora. Portaousc de chest malservije se à fat enstadì Mirella Florian che do esser stata en couda al lonch dant de ruèr al portel del ofize de Poza la se à pissà che ge volea fèr zeche. L'à tout su sotscrizions con na letra da ge manèr al ombolt Giulio Florian percheche l ge fae na segnalazion a la Postes. »L é stat tout su te pech temp n centené de firme – à dit l’assessora Florian – ma n assane tout su n muie de più se fossane jic inant. Coscita no la pel jir, l é na vergogna.«

Te la letra manèda te Comun vegn palesà l malcontent de la jent. »Volon ve segnalar na situazion che, oramai da temp, la é do che la crea n muie de dejajes ai sentadins e che revarda l ofize de la posta de Poza – vegn scrit. L ofize l é avert demò trei dis en setemana e con na soula persona al portel, chest crea coude longe, la jent cogn spetar ence n’ora e l é dificoltà ogetive per chi che cogn far operazion essenziale desche spedizion, paamenc, tor paches o domanar servijes de bancoposta. L’Aministrazion de Comun à tout su sobito la domana di sentadins e la ge à scrit na letra a la direzion de la Postes.

De più tel articol su La Usc stampèda de en vender ai 14 de aost del 2026  (Monica Cigolla)