La Usc di Ladins

Turnoi de scioh »asvelt«
La Bienela Gherdëina nvieia, n cunlaurazion cun la Lia dal Scioh Gherdëina, a n turnoi de scioh »asvelt« tla vedla ustaria dl hotel Ladinia, n dumënia ai 9 de agost dala 17:00 nchin la 19:00
L turnoi ie daviert a duc, esperc y espertes y a duc chëi y duta chëles che à ueia y plajëi a fé scioh.
La partides durerà danter i cin’ y i diesc menuc.
L bar dl hotel, śarà tl 1998, ie stat per truep ani n luech de ancunteda y de vita soziela, ulache seniëures y jënt dl post se ancuntova per n bon got, na ciaculeda o per na partida de scioh. L fin dl turnoi ie chël de ti dé inò vita.
N possa fé pea debant, ma l vën prià bel de se nuté su sun la plata internet biennalegherdeina.org/agenda.

Vijiuns de Helmut Pizzinini y Poldão
I dui artisć badioc se mët adöm por mostré sües ultimes creaziuns tl Salf de Sport Kosrner a Corvara. La vernissaja é en vëndres, ai 7 d’agost, dales 17:00
­»Lascé la jënt zënza pinsier, ma cun la be­lëza de nosta ert. Insciö orunse jí zoruch al momënt dla creaziun, olache la parora n’ê nia ciamó. Zënza la parora podunse se implí le ce cun strotöres de su­blimité. Mo nos sun y restun Helmut Pizzi­nini y Poldão che fej scoltöres y chedri«, scrí i dui artisć tl invit ala mostra che sará da odëi dai 7 d’agost ai 15 d’agost, tres dales 17:00 ales 21:00.

Tosc l’opereta

• 
•  

View the embedded image gallery online at:
https://www.lausc.it/manifestazions-y-evenc/32258-manifestazions-atuales-speziales#sigProIdf431e2458f

ladina »Franzi«
Tl zënter d’La Pli de Mareo gnarál presenté dai 6 de agost 2026 inant por ot iadi, tres dales 21:00, la opereta ladina nöia scrita da Iaco Rigo y Alex Trebo
Do l’opereta ladina tl 2018 »La Zin­gaindra«, s’arjignon a La Pli ala rapre­sentaziiun dl toch nü dal titul »Franzi«. 
La regia é de Erika Castlunger, la di­reziun musicala de Maria Craffonara. 
Les rapresentaziuns sará chisc dis: jöbia ai 6.8., vëndres ai 7.8., sabeda ai 8.8., domënia ai 9.8, y spo l’edema do, jöbia ai 13.8., vëndres ai 14.8., sabeda ai 15.8. (en Santa Maria y feragost) y do­­­­mënia ai 16.8.2026, dagnora dales 21:00. Les prenotaziuns di posć söles tribünes vëgn bele sëgn tutes sö tres WhatsApp (menan messaji de test o audio) al numer +39 393 5137302.

Ilominaziun dl Sassongher
Le crëp simbol de Corvara gnará ilominé ai 7 d’agost, cun acompagnamënt musical dla Müjiga Calfosch – Corvara
En vëndres ai 7 de agost vëgnel tigní a Corvara la ilominaziun tradizionala dl Sassongher. La manifestaziun mët man dales 20:45 y gna­rá abelida dala Müjiga Calfosch–Corvara, che fej l’ingres fora por le zënter de paisc y tëgn spo conzert sön paiun te plaza de co­mun. Tratan le conzert gnará le crëp ilominé da n valgügn mëmbri dl Aiüt Alpinisć Alta Ba­dia y dai Stüdafüch da Corvara. 
L’ilomi­naziun podará gní amirada direta­mënter dal zënter de Corvara, che resta stlüt al trafich tratan döt l’isté dales 18:00 ales 22:30. Dales 20:30 inant vëgnel pité pro paiun n »maritozzo« duc cun crema de nojeles y nida de lat da munt, arjigné ca dal cogo da stëres Simone Cantafio. Por vigni porziun vëgnel damané n contribut de 5€, che vá a fin de bëgn por i proiec de »La miglior vita possibile«, na fondaziun che ti dá suport ales cures paliatives di mituns.

Le lüch te paisc
Produturs dl post presentëia sü produc fora por le zënter da Corvara y adöm a n valgügn coghi gnarál pité spezialités gastronomiches
En mertesc ai 4 de agost i fajará le zënter dl paisc da Corvara por le secundo ann da cornisc ala manifestaziun »Le lüch te paisc«. Dales 18:30 inant sarál deplü produturs dla valada che presentëia y vënn sü produc sciöche ciajos, iogurt, mil, üs, lana de alpaca, erbes da munt, confetöres y deplü sirups. Adöm a n valgönes strotöres da Corvara y sü coghi vëgnel arjigné ca spezialités gastronomiches fates cun chisc produc locai. Al gnará pité de vigni sort de taís sciöche gnoch da soni, pizzes speziales, piada de soni mo ince deplü sorts de duciaries. 
La manifestaziun vëgn abelida da musiga dal ví cun i grups Arton Duo, Hilda&Paul, Vic&Daniel y Bridge Project. Sce al foss bur’ tëmp, vëgn la manifestaziun spostada ala jöbia ai 6 de agost.

»Nuovo Cinema Dolomiti«
Na

• 
•  

View the embedded image gallery online at:
https://www.lausc.it/manifestazions-y-evenc/32258-manifestazions-atuales-speziales#sigProIdf431e2458f

lingia de proiezion debant al chino de Pardac vigni jebia da les 21:00
L MUSE, con sia sezion del Museo geologich de la Dolomites de Pardac, adum con l Trento Film Festival e l Comun de Pardac, sporc na selezion mirèda di miores film che à tout pèrt a la edizion 2026 del Festival cinematografich de la mont de Trent. La proiezions vèrda soraldut ai temes del raport anter om e natura da ponts de veduda desferenc, vejins e dalonc tel temp e ti lesc.
La proiezions vegn metudes a jir vigni jebia del meis de aost da les 21:00 tel chino teater de Pardac, con entrèda ledia e de­bant.
Ai 6 de aost l é l film documentarie trentin ‘Fémene’ de Elena Goatelli e do l curt ‘Prima dell’au­rora Lola’ de Chiara Zoja. Ai 13 vegn moscià ‘The road tu Patagonia’, film australian de Mat­ty Hannon e ai 20 ‘Le Sang et la Boue – Of Mud and Blood’ de Jean Gabriel Leynaud su la minieres de coltran tel Congo. En ultima ai 27 de aost sarà ‘The future of clim­bing’ de Guillaume Broust. Info su www.muse.it.

Walk in-consulënza! Al basta passé, zënza termin!
Le sorvisc por les dependëzes dl’Aziënda Sanitara da Bornech pîta n sorvisc de consulënza por jogn, geniturs, adulc, esperc y assoziaziuns, sura alcohol, droghes, dependënza dal jüch y i.i. en colaboraziun cun le Raiun Sozial Val Badia y le Sorvisc ai Jogn
Val’ iade unse domandes sura alcohol, droghes, nicotina, dependënza da jüch, gaming y social media, dependënza dal cumpré ite... Datrai se fajunse pinsiers por nos instësc o ince por n’atra porsona. Val’ iade fejel bun da nen baié en cört cun zacai. Les psicologhes y les assi­stëntes soziales dl Sorvisc por les dependënzes é chiló por os.
Ci vëgnel pa pité?
Consulënzes cörtes che dëida, ince sce an resta pro na consulënza sora;
Orientamënt y sostëgn;
Informaziuns sön prighi, consum, com­portamënt y prevenziun;
Sostëgn por familiars y esperc;
Confidenzial, debann, anonim;
Zënza termin y zënza complicaziuns.
Al vëgn lauré cun l’atenziun sön ci che é important incö. De pici vari che pó daidé atira!
Can vëgnel pa pité?
Chëstes jöbies, dales 17:00 ales 19:00: ai 6 d’agost, ai 10 de setëmber, ai 15 d’otober, ai 12 de novëmber y ai 10 de dezëmber.
Por che pa?
Le sorvisc é ponsé por: jogn – cun y zënza ge­niturs, adulc, familiars, insegnanc, pedagogs soziai, doturs, asso­ziaziuns y düc chi che á domandes o se fej pinsiers. 
Les consulënzes vëgn pitades tl local dl Sorvisc ai jogn basite, jö por stiga sön la man ciampa.

Se inamoré dl momënt – Soul Motion
Le Consëi de formaziun Badia mët a jí na sëra de bal cun Soul Motion, en mercui ai 5 d’agost dales 19:30, tla Ciasa J. B. Rinna a San Ciascian
Co ciarass pa fora le bal de nosta vita, sce i se inamorasson de vi­gni pice momënt che i un a de­­sposiziun, sëgn y chiló, bel anfat sciöche al é? Tratan chësta sëra de bal se tolunse le tëmp da ponsé sura y da porvé fora la verité de chësc tema. Magari nes scinca le movimënt dl corp val’ resposta interessanta… 
La sëra de bal cun Soul Motion vëgn metüda a jí en mercui ai 5 de agost dales 19:30, tla Ciasa J. B. Rinna a San Ciascian. Re­ferënta é Elsa Pescollderungg.

Musiga »De raisc y ares«
Le Festival Badiamusica pîta en lönesc ai 2 d’agost dales 21:00 n conzert te gran salf a La Val, cun le »Trio Erinus«
»From roots and wings« é le titul dl conzert interpreté dal »Trio Erinus« cun Sonja Wallnö­fer, Alex Designori y Anja Theiner. 
Le program se roda incër les origines, le cambiamënt y les melodies dades inant da generaziun a generaziun. Chësta musiga ne resta nia medema. Ara se svilupëia, vëgn tra­sformada y ascutada danü te na prospetiva contemporana. Sciöche pro n lëgn, sinton inant les raisc, deperpo che al crësc valch de nü. Cun dui saxofons y n clavier, porta dant le trio melodies tradizionales che vëgn da cultures desvalies te n contest contemporan. Tematiches familiares comparësc te tonalités nöies, le monn antich y chël modern se incunta. Composiziuns originales y aranjamënc com­pletëia chësc dialogh.

Franz Comploi y Bach
En lönesc ai 3 d’agost dales 21:00 él te dlijia de Badia n conzert dl orghelist Franz Comploi, che nes condüj te n »iade musical fora por l’Europa, cun Johann Sebastian Bach«
Le Festival Badiamusica pîta ai 3 d’agost a Badia n iade musical fora por l’Europa, cun toc por orghe de Bach y dles generaziuns da denant, che vá dai Paisc Todësc ala Talia cina tla Francia. Chësc percurs mostra sö les tradiziuns esecutives regionales che le genie de orghe Bach á imparé da conësce y aprijé – y che al á ala fin trasformé te so stil. 
La vijita de Johann Sebastian a Dietrich Buxte­hude a Lübeck é stada particolara; ara ti á scinché tröpa ispiraziun y ince n valgönes dificoltés por la dorada de süa sojornanza. Girolamo Frescobaldi unësc la fantasia con­trapuntistica cun le talënt musical tla racoiüda »Fiori musicali«. »Chi questa Bergamasca sonerà non poco imparerà«.

L’Orchestra Haydn a La Ila
L’Orchestra Haydn de Balsan y Trënt é da aldí en lönesc ai 10 d’agost dales 21:00, tla Ciasa dla Cultura a La Ila, tl cheder dl Festival Badiamusica
L’Orchestra Haydn é protagonista de chësc program adöm cun la sopranista Maria Nazarova, mëm­bra dla opera da Viena, tratan che Stefano Ferrario condüj l’en­semble te so rode da maester dl conzert. Le program mët en dia­logh Antonio Salieri y Wolfgang Amadeus Mozart, dui protagonisć dla Viena dl setcënt. L’ascuté sö se svilupëia sciöche n confrun t: la orchestra y la usc se barata jö y se respogn, insciö sciöche les plates di dui componisć. Do n toch strumental vëgnel presenté n’aria, n iade de Salieri y n iade de Mozart, te n jüch de resposta y contrasć che desmostra les peculiarités de vigni autur. »Salieri vs. Mozart« presënta porchël l’incuntada via danter la tradiziun musicala taliana y chëra austriaca – n conzert rich de stimui y ispiraziuns reziproches.




Musical »Hello?« a La Ila
Le musical »Hello?« sará da odëi en vëndres ai 31 de messé dales 18:00, en sabeda ai 1. d’agost dales 15:00 y dales 20:00 y en domënia 2 d’agost dales 19:00 tla Ciasa dla Cultura a La Ila
Leyla á 16 agn y ti ciara tres indô al smartphone, chir l’aprovaziun y i likes ti social media. Laura, 14 agn, é malsigüda y spauia, ara s’archita plü ion te süa ciamena y ti ciara ala vita di atri tres le fonin. Lorenzo, 12 agn, é n apascioné de videojüc y anüza vigni momënt lëde por se lascé ite ti monns virtuai. Y spo él Lina, de 10 agn, la sora de süa classa che n’á nia ciamó n fonin. Insciö nen tolera mefo un adascusc: chël dla mama. Mo te n iade sozedel val’ nia da crëie. Porvia de n ajornamënt misterius, röia i 4... te n smartphone. 
Insciö mët man na aventöra demorvëia, passan por les apps plü desvalies. Sciampé ne sará daldöt nia saurí. Sará mo nosc cuartet bun da ciafé indô le tru cuntra ciasa? Prenota­ziuns sön www.musicalvalbadia.com