La Usc di Ladins

Apuntament da les 8 da doman de en jebia ai 30 de messèl. Na data emportanta per Fascia ajache zacan, e se pel ben l dir, l é ruà a compiment la strèda da rodes e pedonèla de Fascia. Na infrastrutura che la val speta da beleche 30 egn ajache l prum toch a Soraga l é stat fat jà i prumes egn del doimile.  
Per chesta ocajion l é ruà da Trent su l president de la Provinzia Maurizio Fugatti con dirigenc e enjegneres. N picol moment ofizièl ajache en chel medemo dì te Consei provinzièl l era da litèr per l assestament de bilanz e donca per ic la giornèda era jà belebon piena.
Pont de enconter tedant de la caserma di Studafech de Ciampedel dapò duc chenc, con autoritèdes de la val e giornalisć, i é jic n toch a pe su la strèda da rodes fin sul pent sul ruf de Duron per i descorsc e l tai de la veta. 
Con l’inaugurazion de chest ultim toch anter Fontanac e Penìa ades se pel fèr con la roda beleche 50 chilometres, da Molina fin tinsom Fascia. N tassel nef che se jonta apede ai passa 500 chilometres de la rei del Trentin olache se dombra ogne an passa 3 milions de passajes.
»Chest ultim toch de la strèda da rodes e pedonèla da Fontanac a Penìa, de 6,5 chilometres, l é stat belebon engrà da fèr – à dit Deromedis – percheche l é dut apede la Veisc con ponc delicac desche i pents sul ruf de Duron e sul ruf de Antermont a Cianacei che i é stac refac. L é stat fat n muie de operes de parèdes autes ence 10 metres e l é stat metù ju ence i sotservijes de la Set e de la Terna. Duc chisc lurieres à entardivà la consegna, ma i era da fèr.«
Ampò, se acà 25 egn canche la strèda é stata projetèda la podea jir ben, aldidanché la moscia jà si limic e fossa benfat che vegne spartì daperdut i doi percorsc per na maor segureza de duc, descheche l é stat fat anter Ciampedel e Cianacei.

Podede lejer dut su La Usc stampèda dai 7 de aost da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)





 (Monica Cigolla)