La Usc di Ladins

Seconda mostra d’èrt te tobià de Val a Vich: la neva mostra de l’Union di Ladins de Fascia »Imprescions« de Fernando Brunel la é stata enaudèda en sabeda passèda, n percors artistich tras colores e paesajes da mont.

»Imprescions l é chel che veide stroz canche vae entorn con la massaria da depenjer, co la craches e i colores - conta Brunel, president de l’Union e artist. L é durar i colores del prisma, la composizion anter colores primaries e secondaries, che i se ciola ensema desche l ros col vert e l brun col pomaranc. E de segur noscia natura ne sporc n’assa de motives«. Da la seres freides d’invern coi crepes entenc, ai fiores de l’aisciuda, dai colores del uton al vent da d’istà, la mostra l é n viac tras la sajons fascènes depentes da la man del artist te presciapech na trentina de chèdres a elech.

Sabina Willeit, mezsopran e presidenta de la Comunanza Ladina de Bulsan, l’à endeletà l publich, compagnèda da Giorgio Fasciolo al piano, con dotrei cianties per ladin che auza fora l leam con la tera desche »Mi cësa« e »Ladinia patria mia«, test de sie père Carl Willeit e musega de sie om Giorgio Fasciolo. La ciantarina à metù dant ence cianties del compositor fascian Luigi Canori dal liber »Ciantie da mont da spas e dal cör«.
La mostra de Fernando Brunel restarà fora enscin ai 23 de aost, averta ogne dì da les cater fin les set.

De più tel articol su La Usc stampèda de en vender ai 14 de aost del 2026.



 (Nicoletta Riz)