La Usc di Ladins

L'obietif dl'Alta Badia é bele da tröc agn incá chël da se desfarenzié dales atres localités da jí cun i schi, ince tres les aziuns de promoziun o »branding« sciöche an dij tl jargon. La gran pert dles localités da munt adora n lingaz de comunicaziun y mët da jí aziuns che se somëia. Ares vëgn fates tres imajes de contrades, munts, pistes y jënt che vá cun i schi o fej d'atres ativités sön la nëi. Mo de chësc vers ó l'Alta Badia ester pioniera y porchël él gnü tut la dezijiun da jí n ater tru, adoran n lingaz nü y che se desfarenziëia. Ti ultims agn êl gnü adoré le lingaz dla moda, en chësc ann él gnü chirí fora chël dl'ert. Insciö vëgn l'Alta Badia rapresentada sciöche n depënt y lassura él n sciadú – na porsona reala – che vëgn jö cun i schi. Le moto dij: l'Alta Badia é le capolaur dles Dolomites. Capolaur é miné la destinaziun turistica, na localité che se alza fora por la bela contrada dolomitica che se liëia cun la tradiziun y na oferta de ezelënza. La aziun de promoziun é gnüda realisada dala agenzia White, Red & Green da Verona y ara gnará publicada dai 22 de novëmber cina mez jená sön i maius foliec internazionai, sön revistes y d'atres publicaziuns, sciöche ince sön plates internet.   (kp)