La Usc di Ladins

Le regolamënt comunal dl Comun de Badia prevëiga trëi onoranzes a porsones che s’á fat miric particolars, che al sides tl ciamp politich, scientifich, cultural, sozial, sportif o economich. La terza onoranza por importanza é l’atestat de reconescënza dl Comun, spo vëgnel al secundo post le prosc d’onur dl Comun, y plü alalt él la zitadinanza d’onur dl Comun, che pó ti gní surandada a porsones por miric straordinars a bëgn dl comun y de sü abitanc. Cina ciamó él ma öna na porsona che á ciafé chësta majera onoranza: l’ombolt Hermann Pescollderungg dl Soz, che á sorví le Comun de Badia 40 agn alalungia y é sté a ce dl Comun dal 1964 al 1974 y ciamó dal 1980 al 1995.

Sëgn gnarál surandé la secunda onoranza, plü avisa al ombolt da denant Iaco Frenademetz. Chësc é ci che é gnü fat fora al’unanimité dal Consëi de Comun, tla sentada di 22 d’aurí. Sce an ó trá adöm te n pinsier su le ciodí de chësta onoranza, spo él "por le contribut fondamental por le svilup dl Comun y por le bëgn de sü zitadins", sciöche al é gnü alzé fora te Consëi y sciöche al vëgn ince tigní toch tla delibera. Iaco Frenademetz á albü inciaries aministratives tl Comun de Badia por 35 agn alalungia: 10 agn él sté aconsiadú, 9 agn él sté assessur y i ultims 16 agn ál albü la inciaria da ombolt – dal 2009 al 2025. 

Deplü sön chësta dezijiun y les motivaziuns podëise lí t’La Usc di Ladins che vëgn fora la jöbia ai 30 d’aurí  (pablo)