La Usc di Ladins

Sön iniziativa de Gottfried Trebo dl Taser él rové adöm i sogadus dla scuadra dl palé da San Martin da laota, por ti fá n pü’ de festa a so compagn y portier da inlaota Oswald Prada. Le pröm campionat tla Val Badia ê gnü fat l’ann 1971, y bele dl 1975 êl tla valada 8 scuadres: Al Plan, Longega, Rina, San Martin, La Val, Badia, La Ila y Corvara. La finala dl campionat ê gnüda sogada danter Badia y San Martin, olache chisc ultims â davagné al ultim menüt por 2 a 1. Chësta sëra ê porchël ince na ocajiun da se recordé de chisc momënc passá dan da oramai mez secul. Oswald Prada y süa fomena Irma oress rengrazié i ex sogadus dla scuadra da San Martin, por la bela festa che ai ti á organisé a so portier. Ai s’á incunté tla pizzeria "Cristlá" a Antermëia. Por Oswald él sté na gran sorpresa da odëi feter düc sü compagns da plüdadî.
Oswald é gnü atoché da na maratia y ne é nia plü cis bun da jí y tröp tëmp mëssel bele passé sön n scagn da rodes. Sce al ti sozed a zacai val’ de te, él dër important sce an ne vëgn nia desmentiá dai compagns. Por Oswald él sté le sport che l’á dagnora daidé jí inant te süa vita, sides soghé al palé co jí cun i schi.

Deplü nes cunta Irma Trebo t’La Usc di Ladins di 24 de aurí