I pustri ti é stá. Chi che â metü dl 2014 Al Plan pro la "Ferienregion Pustertal", é sëgn stá bogn - ince cun le bëgnsté de nüsc rapresentanc - da porcoré dal logo l’inom ladin de Plan de Corones. Da sëgn inant sarál ma plü "Kronplatz Dolomites". Chësta é la gran novité linguistica pro le design nü, presenté en vëndres tl museum "Lumen". Dit danfora le positif: le logo instës me sá ince garaté, al é tler y elegant. Le ial é gnü plü dinamich, dala ciaradöra energica, mo nia capazia. Le "defet de belëza" é sambëgn che al vá a perde l’inom originar dla munt Plan de Corones. Chësc é le resultat de na politica che vëgn bele portada inant da tröc agn, olache l’inom Plan de Corones é passé da na posiziun
valia a na scritöra tres mëndra, cina al epilogh da incrësce de chësc ann, olache al é sparí daldöt. Insciö sunsi rové en vëndres tla situaziun demorvëia, olache n ladin (le diretur de Kronplatz Brand) ti spliga a n ater ladin (iö) ciodí che an á lascé demez le ladin. Dal punt d’odüda dl marketing m’él döt tler. "An é jüs do a zifres y fac y nia ales emoziuns". Iö me damani indere: pón pa pro na chestiun tan zitia sciöche i inoms de posć lascé demez les emoziuns? I n’ó nia savëi le patatrac sce an ess lascé demez le todësch y tut ma le ladin. Lapró me damani: tan inant pó pa jí le marketing turistich? – che fej cun inoms y confins n pü’ sciöche ara i büta. Che n inom fej süa faziun vëigon da tröc ejëmpli. Un de chisc é "Alta Badia", che é nasciü sciöche toponim turistich. Intratan vëgnel tut ca ince da nosta jënt sciöche localité y é deventé plü popolar co la "Val Badia" instëssa. L’ater ejëmpl vëgn rodunt da Plan de Corones, che ê pro i taliagn de gran lungia plü conesciü co Kronplatz. Mo do la mudaziun dl logo l’ann 2000 - cun le talian cotan plü pice – é la popolarité jüda tres plü zoruch, tan che i aldi ince ladins che vá gonot cui schi sön "Kronplotz". Sce na chestiun tan zitia vëgn iustificada ma cun la logica dl marketing, me stái plülere cun fistide. Le marketing n’é nia la Bibia, y porchël che i esperc le dij, n’él dî nia dit che al sides ingravé tla pera. I esperc â pö ince bravé sö le logo da denant; chël logo che i esperc nüs á sëgn desgort tl refodam. Sciöche an vëiga: i loghi y i trends pó se mudé; la identité dess indere ester öna sora. Le marketing pó dé dant co vëne na destinaziun, mo al ne dess nia avëi le dërt da tó la dezijiun ci inom che pó sté y ciun che dess sparí. Spo lasci bëgn avarëi che la identité ne stá nia ma te n logo, mo dantadöt tles porsones che la vir. N logo é indere ince n sëgn de ci che an ó mostré y valorisé. Sciöche al pe, n’é "Plan de Corones" nia lapró. O sciöche zacai m’á dit do la presentaziun da en vëndres: sëgn unse baié n’ora alalungia de cultura, identité y autentizité, mo intratan s’ái tut l’inom.
